കൊച്ചി: എറണാകുളം ടൗൺഹാളിലെ റൂഫ് ടോപ് സോളാർ പ്ളാന്റ് മേയർ സൗമിനി ജെയിൻ ഉദ്ഘാടനം ചെയ്തു. സൗരോർജ ഉത്പാദനം പ്രോത്സാഹിപ്പിക്കാനുള്ള കൊച്ചി സ്മാർട്ട് മിഷൻ ലിമിറ്റഡിന്റെ സോളാർ റൂഫ് ടോപ് പദ്ധതിയുടെ ഭാഗമായാണ് ടൗൺ ഹാളിൽ 80 കിലോ വാട്ട് ശേഷിയുള്ള സോളാർ പവർ സ്ഥാപിച്ചത്. നഗരത്തിലെ 28 സർക്കാർ കെട്ടിടങ്ങളിലായി മൊത്തം 1000 കിലോ വാട്ട് സൗരോർജം ഉത്പാദിപ്പിക്കാൻ ശേഷിയുള്ള പ്ളാന്റുകളാണ് സ്ഥാപിക്കുന്നത് ഇതിൽ 22 കെട്ടിടങ്ങളിൽ പാനലുകൾ സ്ഥാപിച്ച് വൈദ്യുതി ഉത്പാദനം തുടങ്ങി. ശേഷിക്കുന്ന ആറ് കെട്ടിടങ്ങളിൽ മൂന്നെണ്ണത്തിന്റെ നിർമ്മാണം പൂർത്തിയായി. 20 കിലോ വാട്ട് മുതൽ 80 കിലോ വാട്ട് വരെയാണ് ഓരോ പ്ളാന്റിന്റെയും ഉത്പാദനക്ഷമത. 1.46 ദശലക്ഷം യൂണിറ്റ് വൈദ്യുതി ഒരു വർഷത്തിനുള്ളിൽ ഈ പ്ളാന്റുകളിൽ നിന്ന് ഉത്പാദിപ്പിക്കാനാണ് ലക്ഷ്യമിടുന്നത്.

പദ്ധതി നിലവിൽ വരുന്നതോടെ വൈദ്യുതിബിൽ ഇനത്തിൽ പ്രതിവർഷം ഒരു കോടി രൂപ വരെ ലാഭിക്കാൻ സാധിക്കുമെന്നാണ് പ്രതീക്ഷ. ആയിരം ടൺ കാർബൺ ബഹിർഗമനം കുറയ്ക്കുന്നതിനും ഇതു വഴിയൊരുക്കും.ഇൻഡഗ്രേറ്റഡ് കമാൻഡ് കൺട്രോൾ ആൻഡ് കമ്മ്യൂണിക്കേഷൻ സെന്ററിൽ നിന്ന് സോളാർ പ്ളാന്റുകളെ നിരീക്ഷിക്കാനും നിയന്ത്രിക്കാനും സാധിക്കും. പദ്ധതിയിലെ ഏറ്റവും ഉയർന്ന ഉത്പാദനക്ഷമതയുള്ള പ്ളാന്റാണ് ടൗൺഹാളിൽ സ്ഥാപിച്ചിരിക്കുന്നത്. ടൗൺഹാളിന്റെ ഉപയോഗത്തിന് ശേഷം ഗ്രിഡിലേക്ക് വൈദ്യുതി നൽകും.

അഞ്ചു കോടിയോളം രൂപ ചെലവഴിച്ച് ഒരു മെഗാവാട്ട് വൈദ്യുതി ഉത്പാദിപ്പിക്കുന്ന പദ്ധതിയാണ് കൊച്ചി സ്മാർട്ട് സിറ്റി പദ്ധതിയിൽ ഉൾപ്പെടുത്തി കൊച്ചിയിൽ നടപ്പാക്കുന്നത്. കൊച്ചി കോർപ്പറേഷൻ ആസ്ഥാനം, ഗവ.ആയുർവേദ ആശുപത്രി, ജില്ല കോടതി, അഡ്വ.ജനറൽ ഓഫീസ്, കെ.എസ്.ഇ.ബി, എക്‌സൈസ് ഓഫീസ് തുടങ്ങി പ്രധാന കെട്ടിടങ്ങളിലെല്ലാം സോളാർ പാനലുകൾ സ്ഥാപിച്ചു കഴിഞ്ഞു.