സോഷ്യൽ മീഡിയയിൽ അനശ്വര രാജനെതിരെ നടന്ന സൈബർ ആക്രമണത്തെ കുറിച്ചുള്ള ചർച്ചകൾ ചൂടുപിടിച്ചിരിക്കുകയാണ്. മോഡേൺ വസ്ത്രത്തിൽ എത്തിയതാണ് താരത്തിനെതിരെ തിരിയാൻ സദാചാര വാദികളെ പ്രേരിപ്പിച്ചത്. പിന്നാലെ അനശ്വര തന്റെ കൂടുതൽ ചിത്രങ്ങൾ പങ്കുവച്ച് അവർക്ക് മറുപടി നൽകിയിരുന്നു. ഇതിന് ശേഷം സോഷ്യൽ മീഡിയയിലൂടെ അനശ്വരയ്ക്ക് പിന്തുണയുമായി നിരവധി താരങ്ങളാണ് രംഗത്ത് എത്തിയത്. റിമ കല്ലിങ്കൽ, പാർവതി, നസ്രിയ, അഹാന, അമേയ, അനാർക്കലി മരിക്കാർ തുടങ്ങി നിരവധി താരങ്ങൾ പിന്തുണയുമായെത്തിയിരുന്നു.

ചിത്രം സോഷ്യൽ മീഡിയയിൽ വളരെ പെട്ടന്നാണ് വാർത്തയായത്. ഇപ്പോഴിതാ ആക്രമണങ്ങളെ കുറിച്ച് അനശ്വര തന്നെ മനസ് തുറക്കുകയാണ്. "സെപ്തംബർ 8 നായിരുന്നു 18 വയസായത്. അപ്പോഴായിരുന്നു ഫോട്ടോഷൂട്ട് നടത്തിയത്..." ചിത്രങ്ങൾ തനിക്ക് ഏറെ ഇഷ്ടപ്പെട്ടെന്നും അതുകൊണ്ടാണ് പോസ്റ്റ് ചെയ്തതെന്നും അനുശ്വര പറയുന്നു. തിങ്കളാഴ്ച വരെ കമന്റുകളൊന്നും കണ്ടിരുന്നില്ല. ഒരു കല്യാണവുമായി ബന്ധപ്പെട്ട തിരക്കുകളിലായിരുന്നു.

കുറച്ചു കമന്റുകൾ കൊണ്ട് തന്നെ മൂഡ് മനസിലായി. ആദ്യം അവഗണിക്കാനാണ് തീരുമാനിച്ചത്. പക്ഷെ കാര്യങ്ങൾ കൈവിട്ടു പോകുമെന്നായപ്പോൾ അതിനെ നേരിടണമെന്ന് തോന്നിയെന്ന് അനശ്വര പറയുന്നു. കമന്റുകൾ വൈകാരികമായി തന്നെ ബാധിച്ചില്ല. പക്ഷെ നമ്മൾ 21ാം നൂറ്റാണ്ടിലും പുരോഗമന കേരളത്തിലുമാണോ ജീവിക്കുന്നതെന്ന് തോന്നിയെന്നും അനശ്വര പറഞ്ഞു. "എന്റെ ഫോട്ടോകളിൽ കമന്റ് ചെയ്ത സഹോദരിമാരേയും അയൽക്കാരേയും കുറിച്ചാണ് ചിന്തിച്ചത്. അവർക്കും കാണില്ലേ ഇഷ്ടമുള്ള വസ്ത്രം ധരിക്കാനുള്ള ആഗ്രഹം. സംസ്‌കാരത്തിന്റേയും സദാചാരത്തിന്റേയും പേരു പറഞ്ഞ് അവരും അടിച്ചമർത്തപ്പെടില്ലേ? എന്നെ പോലെയുള്ള ആ പെൺകുട്ടികൾക്ക് വേണ്ടിയാണ് ഞാൻ പ്രതികരിച്ചത്" അനശ്വര പറയുന്നു.പ്രശ്നം തന്റേതല്ലെന്നും അവരുടേതാണെന്നും അവരെയാണ് പഠിപ്പിക്കേണ്ടതെന്നും അനശ്വര പറയുന്നു. തന്റെ കുടുംബത്തിനോ സുഹൃത്തുക്കൾക്കോ തന്റെ വസ്ത്രം പ്രശ്നമല്ല. കമന്റുകൾ വായിച്ചു കൊടുത്തപ്പോൾ അച്ഛൻ പറഞ്ഞത് കുറച്ചുകൂടെ ചെറിയ വസ്ത്രം അടുത്ത തവണ വാങ്ങിത്തരാം എന്നാണെന്നും അനശ്വര പറയുന്നു. എന്തു ധരിക്കണമെന്നത് അവരവരുടെ ഇഷ്ടമാണെന്നും അനശ്വര വ്യക്തമാക്കുന്നു.

പിന്തുണയുമായി ഹരീഷ് പേരടിയും

താരത്തിന് സപ്പോർട്ടുമായി രംഗത്തെത്തിയിരിക്കുകയാണ് ഹരീഷ് പേരടി. "കാലുകൾ കാണുമ്പോൾ കാമം പൂക്കുന്ന സദാചാര കോമരങ്ങൾക്കെതിരെ പ്രതിഷേധിക്കുന്ന എന്റെ പ്രിയപ്പെട്ട സഹോദരിമാരോട് ആത്മാർത്ഥമായി ഐക്യദാർഢ്യം പ്രഖ്യാപിക്കുന്നു.അത്രയൊന്നും മൊഞ്ചില്ലാത്ത എന്റെ കാലുകൾ സമർപ്പിച്ച് ഞാനും ഐക്യപ്പെടുന്നു. ഈ ശരീര ഭാഷയുടെ രാഷ്ട്രീയം നന്മയുള്ള ലോകം ഏറ്റെടുക്കട്ടെ..."എന്നാണ് കുറിച്ചിരിക്കുന്നത്.