കല്ലമ്പലം: നാവായിക്കുളം വില്ലേജ് ഓഫീസിൽ നിന്ന് രേഖകൾ യഥാസമയം ലഭിക്കുന്നില്ലെന്ന് പരാതി. വില്ലേജിൽ നിന്ന് ലഭിക്കേണ്ട അത്യാവശ്യ രേഖകൾ യഥാസമയം ലഭിക്കുന്നില്ലെന്നാണ് ആക്ഷേപം. ഇതുമൂലം ദുരിതമനുഭവിക്കുന്ന നിരവധിപേർ പ്രതിഷേധവുമായി രംഗത്തെത്തിയിട്ടുണ്ട്. നാവായിക്കുളം വില്ലേജിന്റെ ഒരുഭാഗം കുടവൂർ വില്ലേജ് ഓഫീസിലേക്ക് മാറ്റിയെങ്കിലും നാവായിക്കുളം വില്ലേജ് ഓഫീസിൽ ഭൂഉടമകളുടെ എണ്ണത്തിൽ കാര്യമായ കുറവൊന്നുമില്ല. കഴിഞ്ഞ രണ്ടു വർഷങ്ങൾക്കു മുമ്പ് വില്ലേജിലെ ഭൂരേഖകൾ കമ്പ്യൂട്ടറിൽ രേഖപ്പെടുത്തി ഭൂമി സംബന്ധമായ ഇടപാടുകൾ നടന്നുവരികയാണ്. എന്നാൽ കമ്പ്യൂട്ടറിൽ ഭൂരേഖകൾ ഉൾക്കൊള്ളിച്ചപ്പോൾ നിലവിലുള്ള പട്ടയ വസ്തു ഉടമകളുടെ രേഖകളിൽ നിരവധി പിശകുകൾ ഉണ്ടായെന്നാണ് ആക്ഷേപം. യഥാർത്ഥ പട്ടയക്കാരന്റെ പേരിലും, മേൽവിലാസത്തിലും തെറ്റുപറ്റിയതായും ഇതുമൂലം പലർക്കും കരം അടയ്ക്കുന്നതിനോ, ആവശ്യമായ സർട്ടിഫിക്കറ്റുകൾ വാങ്ങുന്നതിനോ കഴിയാത്ത സാഹചര്യമാണുള്ളതെന്നും ഭൂഉടമകൾ പറയുന്നു. ഈ പിശകുകൾ പരിശോധിക്കുന്നതിന് ആധാരമായ തണ്ടപ്പേർ രജിസ്റ്റർ വില്ലേജ് ഓഫീസിൽ നിന്നും പോക്കുവരവ് കേസ് സംബന്ധമായി ഹൈക്കോടതിയിലേക്ക് കൊണ്ടുപോയിട്ട് ഒന്നര വർഷത്തിൽ കൂടുതലായെന്നും ഇതുവരെ തിരികെ കിട്ടിയിട്ടില്ലെന്നുമാണ് വില്ലേജ് അധികൃതർ വെളിപ്പെടുത്തിയത്. വസ്തു ഉടമകൾക്ക് കരം അടയ്ക്കുന്നതിന് കഴിയുന്നില്ല. ഇതുമൂലം ബാങ്കുകളിൽ നിന്നും സ്വർണ്ണത്തിൻമേൽ കാർഷിക വായ്പകളോ മറ്റ് ലോണുകളോ ലഭിക്കുന്നില്ല. തണ്ടപ്പേർ രജിസ്റ്റർ കോടതിയിൽ നിന്ന് തിരികെയെത്തിക്കാനോ, കമ്പ്യൂട്ടറിൽ വന്ന പിശകുകൾ തിരുത്താനോ ബന്ധപ്പെട്ടവരുടെ ഭാഗത്തു നിന്ന് നടപടിയുണ്ടാകുന്നില്ല. പ്രശ്നത്തിന് ശാശ്വത പരിഹാരം കാണണമെന്നാണ് ഭൂഉടമകളുടെ ആവശ്യം.

പ്രതികരണം

വില്ലേജുകളിൽ ഭൂമികൈമാറ്റം ചെയ്യുമ്പോഴുണ്ടാകുന്ന പട്ടയ മാറ്റവും ഭൂഉടമകൾക്ക് ആവശ്യമായി വരുന്ന കൈവശാവകാശ സർട്ടിഫിക്കറ്റുകളും നികുതി അടയ്ക്കലും മറ്റും നടത്തുന്നതിന് വില്ലേജ് ഓഫീസിലെ പ്രധാന രേഖകളിലൊന്നാണ് തണ്ടപ്പേർ രജിസ്റ്റർ. കോടതികളിൽ നിന്നും മറ്റും വരുന്ന റിക്കവറി നോട്ടിഫിക്കേഷനും ഇതിലാണുള്ളത്. ഇത് വില്ലേജ് ഓഫീസിൽ ഇല്ലാത്തത് പല രേഖകളും അപേക്ഷകർക്ക്‌ നൽകാൻ സാധിക്കാതെ വരും. മാസങ്ങളായി അപേക്ഷ നൽകി കാത്തിരിക്കുന്നവർ നിരവധിപേരാണ്. ഇതിനടിയന്തിരമായി ശാശ്വത പരിഹാരം കാണണം.

വി. കമലാസനൻ

(പൊതുപ്രവർത്തകൻ)

മാവിൻമൂട്, കല്ലമ്പലം

ആരോപണങ്ങൾ അടിസ്ഥാനരഹിതമാണ്. തണ്ടപ്പേർ രജിസ്റ്റർ കോടതിയുടെ ആവശ്യപ്രകാരം നൽകിയത് വാസ്തവമാണ്. അത് തിരികെ ലഭിക്കാനായി നടപടികൾ സ്വീകരിച്ചുകഴിഞ്ഞു. തണ്ടപ്പേർ രജിസ്റ്റർ ഇല്ലെങ്കിൽ തന്നെയും ഉപാധികളോടെ വില്ലേജിൽ ലഭിക്കുന്ന അപേക്ഷകളിൽമേൽ കാലതാമസമില്ലാതെ തന്നെ നടപടികൾ കൈകൊള്ളുന്നുണ്ട്.

ബേബി

(നാവായിക്കുളം വില്ലേജ് ഓഫീസർ)