കല്ലമ്പലം: കുടവൂരിൽ കരടിയെ കണ്ടതായുള്ള സംശയത്തെ തുടർന്ന് നാട്ടുകാർ ജാഗ്രതയിൽ.

അടുത്തിടെ കൊല്ലം ജില്ലയിലെ ശീമാട്ടി, കല്ലുവാതുക്കൽ പ്രദേശങ്ങളിൽ കണ്ടെത്തിയ കരടി നാവായിക്കുളം പഞ്ചായത്തിന്റെ കുടവൂർ പ്രദേശങ്ങളിൽ എത്തിയതായാണ് സംശയം. നാട്ടുകാരിൽ ചിലർ കരടിയെയും കരടിയുടെ കാൽപ്പാടുകളും കണ്ടെന്നാണ് പറയുന്നത്.

മടന്തപ്പച്ച സ്വദേശി റൈഹാനത്താണ് കഴിഞ്ഞദിവസം രാത്രിയിൽ പുറത്തിറങ്ങിയപ്പോൾ കരടിയെ കണ്ടതായി പറഞ്ഞത്. ഇവർ ബഹളം വച്ചതിനെ തുടർന്ന് നാട്ടുകാർ തെരച്ചിൽ നടത്തിയെങ്കിലും കരടിയെ കണ്ടെത്താനായില്ല. എന്നാൽ കരടിയുടെതെന്ന് തോന്നിക്കുന്ന കാൽപ്പാടുകൾ കണ്ടെത്തി. പൊലീസും സ്ഥലത്തെത്തി പരിശോധന നടത്തി.