തിരുവനന്തപുരം: കൊല്ലം ബൈപ്പാസിൽ ടോൾ പിരിക്കുന്നതിന് കേന്ദ്രസർക്കാർ പുറപ്പെടുവിച്ച വിജ്ഞാപനം പിൻവലിക്കണമെന്ന് മന്ത്രി ജി. സുധാകരൻ ആവശ്യപ്പെട്ടു. 352 കോടി രൂപ ചെലവു വന്ന കൊല്ലം ബൈപ്പാസിന്റെ നിർമ്മാണത്തിനായി 176 കോടി രൂപ സംസ്ഥാന സർക്കാരാണ് വഹിച്ചത്. ബൈപ്പാസ് ഉദ്ഘാടന ശേഷം ടോൾ പിരിക്കാനുള്ള നീക്കം ഒഴിവാക്കണമെന്നാവശ്യപ്പെട്ട് കേന്ദ്രത്തിനു കത്ത് നൽകിയിരുന്നു. അതിനാൽ ഇതുവരെ ടോൾ പിരിച്ചില്ല. അതിനിടെയാണ് വീണ്ടും കേന്ദ്ര വിജ്ഞാപനം വന്നത്. സംസ്ഥാന സർക്കാർ ചെലവാക്കിയ തുകയ്ക്ക് ടോൾ ആവശ്യമില്ല. കേന്ദ്രസർക്കാർ ഇതിൽ നിന്നും പിന്തിരിയണമെന്നും മന്ത്രി ആവശ്യപ്പെട്ടു.