മുതുകുളം: കണ്ടെയ്ൻമെന്റ് സോണും റോഡിന്റെ ശോചനീയാവസ്ഥയും കണ്ടല്ലൂർ പഞ്ചായത്തിലെ തോപ്പിൽകടവ് -കല ജംഗ്ഷൻ റോഡിനു ഇരുവശത്തുമുള്ള കുടുംബങ്ങളെ ദുരിതത്തിലാഴ്ത്തി​യി​രി​ക്കുകയാണ്. കണ്ടെയ്ൻമെന്റ് സോൺ ആയതിനാൽ കല ജംഗ്ഷൻ പൂർണമായി അടച്ചു. നവീകരണത്തിന്റെ ഭാഗമായി തോപ്പിൽ കടവിൽ റോഡ് കുറുകെ വെട്ടിമുറിച്ചി​ട്ടി​രി​ക്കുകയാണ്. ഇതുമൂലം ഇവിടെ ഗതാഗതം പൂർണമായും തടസപ്പെട്ട നിലയിലാണ്. വൃദ്ധരായ രോഗികളെ ആശുപത്രിയിൽ എത്തിക്കുന്നതിന് പോലും സാധിക്കാത്ത അവസ്ഥയാണ് . മഴ മാറിയതിനു ശേഷമേ റോഡ്‌ നവീകരണം നടക്കുകയുള്ളൂ .കോവിഡ് വ്യാപനം കൂടിയതിനാൽ റോഡ് തുറന്ന് കൊടുക്കാൻ കഴിയുന്നുമില്ല .എന്നാൽ രോഗികൾ കൂടുതൽ ഉള്ള മറ്റ് പ്രദേശങ്ങളി​ലെ റോഡ് അടക്കാതെയാണ് കല ജംഗ്ഷൻ കെട്ടി അടച്ചതെന്നും ആരോപണമുണ്ട് .