ചേർത്തല: സാന്ത്വനം പെയിൻ ആൻഡ് പാലിയേ​റ്റീവ് കെയർ സൊസൈ​റ്റി ചേർത്തലയുടെ ഭാഗമായ വിശപ്പുരഹിത ചേർത്തല ആയിരം ദിനം പൂർത്തീകരിക്കുന്നതിന്റെ ഭാഗമായി സി.പി.എം പള്ളിപ്പുറം വടക്ക് ലോക്കൽ കമ്മി​റ്റിയുടെ നേതൃത്വത്തിൽ 105 ചാക്ക് അരിയും,പച്ചക്കറിയും,പലചരക്ക് ഉൾപ്പെടെ മ​റ്റ് ഭക്ഷ്യധാന്യങ്ങളും കൈമാറി.

ചേർത്തല നഗരസഭയിലെയും തൈക്കാട്ടുശ്ശേരി ബ്ലോക്ക് പഞ്ചായത്തിനു കീഴിലെ 5 പഞ്ചായത്തുകളിലെയും 300ലധികം വരുന്ന നിരാലംബരായ ജനങ്ങൾക്ക് ദിവസവും ഉച്ചഭക്ഷണം നൽകുന്ന പദ്ധതിയാണ് വിശപ്പുരഹിത ചേർത്തല. കൊവിഡ് രൂക്ഷമായിട്ടും കഴിഞ്ഞ ആയിരം ദിവസമായി മുടക്കമില്ലാതെ ഉച്ചഭക്ഷണം നൽകുന്നുണ്ട്. ഭക്ഷ്യധാന്യങ്ങൾ നൽകുന്നതിന്റെ ഫ്ലാഗ് ഒഫ് സാന്ത്വനം പെയിൻ ആൻഡ് പാലിയേ​റ്റീവ് സൊസൈ​റ്റി ചെയർമാൻ കെ.രാജപ്പൻ നായർ നിർവഹിച്ചു. ഡി.വൈ.എഫ്‌.ഐ ജില്ലാ വൈസ് പ്രസിഡന്റ് സി.ശ്യാം കുമാർ,ലോക്കൽ കമ്മി​റ്റി സെക്രട്ടറി എൻ.ആർ.രാജേഷ്,എം.വി.മണിക്കുട്ടൻ,കെ.കെ.രമേശൻ, എൻ.കെ.മോഹൻദാസ് എന്നിവർ പങ്കെടുത്തു.