അമ്പലപ്പുഴ: 74-ാമത് പുന്നപ്ര വയലാർ രക്തസാക്ഷി വാർഷിക വാരാചരണത്തിന്റെ ഭാഗമായി രക്തസാക്ഷികൾ അന്ത്യവിശ്രമം കൊള്ളുന്ന പുന്നപ്ര സമരഭൂമിയിലെ രക്തസാക്ഷി മണ്ഡപത്തിൽ ഇന്ന് രാവിലെ 9ന് പുഷ്പാർച്ചന നടത്തും. മന്ത്രി ജി. സുധാകരൻ, സി.പി.എം ജില്ലാസെക്രട്ടറി ആർ. നാസർ, സി.പി.ഐ ജില്ലാസെക്രട്ടറി ടി .ജെ. ആഞ്ചലോസ്, സി.പി. എം ജില്ലാസെക്രട്ടേറിയറ്റംഗം ജി. വേണുഗോപാൽ, ജില്ലാ കമ്മിറ്റിയംഗം എച്ച് .സലാം, ഏരിയ സെക്രട്ടറി കെ .മോഹൻ കുമാർ, വാരാചരണ കമ്മിറ്റി പ്രസിഡന്റ് ഇ. കെ. ജയൻ എന്നിവർ പുഷ്പാർച്ചന നടത്തും. കൊവിഡ് പ്രോട്ടോകോൾ പാലിച്ചാകും പുഷ്പാർച്ചന. വിവിധ വാർഡ് വാരാചരണ കമ്മിറ്റികളുടെ നേതൃത്വത്തിൽ വാർഡുകളിൽ പ്രത്യേകം തയ്യാറാക്കിയ മണ്ഡപങ്ങളിലും പുഷ്പാർച്ചന നടക്കും. 11 ന് സമരഭൂമിയിൽ ചേരുന്ന രക്തസാക്ഷി അനുസ്മരണ സമ്മേളനത്തിൽ സി.പി.എം ജില്ലാ സെക്രട്ടറി ആർ .നാസർ, സി.പി.ഐ ജില്ലാ സെക്രട്ടറി ടി .ജെ .ആഞ്ചലോസ് എന്നിവർ അനുസ്മരണ പ്രസംഗം നടത്തും. വാരാചരണ കമ്മിറ്റി പ്രസിഡന്റ് ഇ .കെ. ജയൻ അധ്യക്ഷത വഹിക്കും. വൈകിട്ട് 3 ന് സമരഭൂമിയിലെ രക്തസാക്ഷി മണ്ഡപത്തിൽ നിന്ന് പറവൂർ രക്ത സാക്ഷി അനുസ്മരണ മണ്ഡപത്തിലേക്ക് ദീപശിഖാ റിലേ നടത്തും. സമര സേനാനി കൊച്ചിക്കാരൻ വീട്ടിൽ മാർട്ടിന്റെ മകൻ ജോയി മാർട്ടിൻ പകർന്നു നൽകുന്ന ദീപം ഡി .വൈ .എഫ്. ഐ ഏരിയ ജോയിന്റ് സെക്രട്ടറി അരുൺ ലാൽ ഏറ്റുവാങ്ങും. തുടർന്ന് കുതിരപ്പന്തി റോഡുവഴി കളർ കളർകോട് ജംഗ്ഷനിലെത്തുന്ന ദീപശിഖാ റിലേ ദേശീയ പാത വഴി പറവൂരിലെ രക്തസാക്ഷി മണ്ഡപത്തിൽ വൈകിട്ട് 5 ന് എത്തിച്ചേരുമ്പോൾ പുന്നപ്ര വയലാർ സമരസേനാനി കണ്ണങ്ങാട്ടു വെളിയിൽ പുരുഷന്റെ ചെറുമകൻ കെ .എം .ഉണ്ണിയിൽ നിന്ന് വാരാചരണ കമ്മിറ്റി പ്രസിഡന്റ് ഏറ്റുവാങ്ങി അനുസ്മരണ മണ്ഡപത്തിൽ സ്ഥാപിക്കും.