ഹരിപ്പാട്: കരുവാറ്റ ബാങ്ക് കവർച്ച കേസിലെ ഒന്നാംപ്രതി ആൽബിൻ രാജ്, രണ്ടാംപ്രതി ഷൈബു എന്നിവരുമായി​ പൊലീസ് കൊല്ലത്ത് തെളി​വെടുപ്പ് നടത്തി​. മോഷണശേഷം ആൽബിൻ രാജും, ഷൈബുവും കൊല്ലം ജില്ലയുടെ വിവിധ ഭാഗങ്ങളിൽ പോയിരുന്നു. മോഷണത്തിന് ഉപയോഗിച്ച ഗ്യാസ് സിലിണ്ടറുകൾ, ഇവ കൊണ്ടുവരാൻ ഉപയോഗിച്ച ഒമിനി വാൻ, ബാങ്കിൽ നിന്നും എടുത്ത സി.സി ടിവി, കമ്പ്യൂട്ടർ സി.പി.യുകൾ എന്നിവ ഇന്നലെ കണ്ടെടുത്തു. ഒമി​നി​ വാൻ മോഷ്ടിച്ചതിന് പൊലീസ് ഒരു കേസ് രജി​സ്റ്റർ ചെയ്തു. കടയ്ക്കൽ സ്വദേശിയുടെ വാഹനം മോഷ്ടി​ച്ച ഇവർ ബാങ്ക് കൊള്ളയടി​ച്ചശേഷം തൊട്ടടുത്ത ദിവസം അഞ്ചൽ ഉൾഭാഗത്തുള്ള വനമേഖലയിൽ ഉപേക്ഷിക്കുകയായി​രുന്നു. ഈ ഭാഗത്ത് തന്നെ വനത്തിലാണ് ബാങ്കിലെ സി.സി ടിവി യും രണ്ട് സി.പി.യുകളും ഉപേക്ഷിച്ചിരുന്നത്. ഇവയും കണ്ടെത്തി. ബാങ്കിലെ ലോക്കർ കട്ട് ചെയ്യാനായി ഉപയോഗി​ച്ച ഗ്യാസ് സിലിണ്ടറുകൾ പുനലൂർ പോളിടെക്നിക് സമീപം റോഡിൽ നി​ന്നും അഞ്ച് അടി താഴ്ചയുള്ള ഭാഗത്ത് നി​ന്ന് കണ്ടെടുത്തു. കഴിഞ്ഞ ദിവസം ഷൈബുവിന്റെ ഹരിപ്പാടുള്ള വാടകവീട്ടിലെ കിണർ പൊലീസ് വറ്റിച്ചിരുന്നെങ്കി​ലും ഇതിൽ നിന്നും ഒന്നും ലഭിച്ചില്ല.