ഇരയായത് ഉറങ്ങിക്കിടന്ന പ്രായപൂർത്തിയാകാത്ത പെൺകുട്ടികൾ

ന്യൂഡൽഹി: ഉത്തർപ്രദേശിൽ പ്രായപൂർത്തിയാകാത്ത മൂന്ന്​ ദളിത്​ സഹോദരിമാർക്ക് നേരെ ആസിഡ്​ ആക്രമണം. ഉത്തർപ്രദേശിലെ ഗോണ്ട ജില്ലയിലെ പർസാപൂരിലെ വീട്ടിൽ ഉറങ്ങിക്കിടന്ന 8​, 12, 17 വയസുള്ള പെൺകുട്ടികളുടെ ദേഹത്തേക്ക് അജ്ഞാതനായ അക്രമി ആസിഡ് ഒഴിക്കുകയായിരുന്നു. ഇന്നലെ പുലർച്ചെ 1.30നാണ് ​സംഭവം.

മാതാപിതാക്കൾ വരാന്തയിലും പെൺകുട്ടികൾ ഒന്നാം നിലയിലെ മുറിയിലുമായി ഉറങ്ങിക്കിടക്കുകയായിരുന്നെന്ന് പെൺകുട്ടികളുടെ അച്ഛൻ പറഞ്ഞു. ഏണി ഉപയോഗിച്ച് വീടിന്റെ ഒന്നാം നിലയിൽ കയറി അക്രമി തുറന്ന് കിടന്ന ജനലിലൂടെ പെൺകുട്ടികളുടെ നേർക്ക്​ ആസിഡ്​ ഒഴിച്ചശേഷം കടന്നുകളയുകയായിരുന്നു. കുട്ടികളുടെ നിലവിളി കേട്ട് ഉണർന്ന മാതാപിതാക്കൾ വാതിൽ തുറന്ന് അകത്ത് കയറിയപ്പോൾ പൊള്ളലേറ്റ് അലറിക്കരയുന്ന കുട്ടികളെയാണ് കണ്ടത്.

17വയസുകാരിക്ക്​ 30 ശതമാനം പൊള്ള​ലേറ്റു. 12 വയസുകാരിക്ക്​ 20 ശതമാനവും എട്ടുവയസുകാരിക്ക്​ ഏഴ് ശതമാനവും പൊള്ളലേറ്റിട്ടുണ്ട്​. മൂവരെയും ആശുപത്രിയിൽ പ്രവേശിപ്പിച്ചു. കുട്ടികൾ അപകടനില തരണം ചെയ്തതായി ആശുപത്രി അധികൃതർ അറിയിച്ചു. ആക്രമണത്തിന് പിന്നിൽ ആരാണെന്ന് അറിയില്ലെന്നും പെൺകുട്ടികളുടെ മാതാപിതാക്കൾ പറഞ്ഞു.

സംഭവത്തിൽ പൊലീസ്​ ഇതുവരെ ആരെയും അറസ്റ്റ് ചെയ്തിട്ടില്ല.

പെൺകുട്ടികളുടെ ദേഹത്ത്​ ഒഴിച്ച രാസപദാർത്ഥം പരിശോധിച്ച്​ വരികയാണെന്നും അവർ ജില്ലാ ആശുപത്രിയിൽ ചികിത്സയിലാണെന്നും ഗോണ്ട എസ്​.പി. ശൈലേഷ്​ കുമാർ പറഞ്ഞു. അക്രമിക്ക് വീടിനെക്കുറിച്ചും പെൺകുട്ടികൾ ഉറങ്ങുന്ന സ്ഥലത്തെക്കുറിച്ചും കൃത്യമായ ധാരണയുണ്ടായിരുന്നു. അതിനാലാണ് ഏണി ഉപയോഗിച്ച് ഒന്നാംനിലയിൽ കയറിപ്പറ്റിയത്. സംഭവസ്ഥലത്ത് ഫോറൻസിക്​ സംഘം പരിശോധന നടത്തിയെന്നും പ്രതികളെ ഉടൻ പിടികൂടുമെന്നും ​അദ്ദേഹം കൂട്ടിച്ചേർത്തു. അക്രമത്തിന്റെ പിന്നിലെ കാരണം കണ്ടെത്താനുള്ള ശ്രമത്തിലാണ് പൊലീസ്. മൂത്തപെൺകുട്ടിക്ക് ഇക്കാര്യത്തിൽ എന്തെങ്കിലും തുമ്പ് നൽകാനാവുമെന്ന പ്രതീക്ഷയിലാണ് പൊലീസ്.

സ്ത്രീകൾക്കെതിരെ അതിക്രമം നടത്തുന്ന പ്രതികളെ യു.പി സ‌ർക്കാ‌ർ രാഷ്ട്രീയപരമായും അല്ലാതെയും പിന്തുണയ്ക്കുന്നതിനാലാണ് സംസ്ഥാനത്ത് അക്രമങ്ങൾ തുടർക്കഥയാകുന്നത്.

- പ്രിയങ്ക ഗാന്ധി, എ.ഐ.സി.സി. ജനറൽ സെക്രട്ടറി