കോലഞ്ചേരി: കൊവിഡ് കാലത്ത് വെറുതേ നിന്നും കിടന്നും തിന്നും ആനകൾക്കും തടികൂടി. പുറമേ ആരോഗ്യപ്രശ്നങ്ങളും. പരിഹാരമായി കേരളത്തിലെ ഗജരാജന്മാരൊക്കെ രാവിലെയും വൈകിട്ടും നടപ്പാണ്. എരണ്ട കെട്ടാണ് ( മലബന്ധം )​ ഇപ്പോൾ ആനകളുടെ പ്രധാന ഏനക്കേട്.വർഷങ്ങളായി​ നാട്ടാനകളുടെ സഞ്ചാരം ലോറിയിലായതോടെ നടത്തം കുറവാണ്. ഉത്സവങ്ങളും ആഘോഷങ്ങളും കൊവിഡ് മുടക്കിയതോടെ ഉള്ള അദ്ധ്വാനവും ഇല്ലാതായി​. ദഹന പ്രക്രിയയെ ബാധി​ച്ചു.മുമ്പൊക്കെ ഇരുപതും മുപ്പതും കിലോമീ​റ്റർ നടത്തിയായിരുന്നു എഴുന്നള്ളിപ്പിനും മ​റ്റും കൊണ്ടുപോയിരുന്നത്. ഗജരാജൻ തിരുവമ്പാടി ശിവസുന്ദർ അടക്കം എട്ട് ആനകളാണ് ജനുവരി ഒന്നിനുശേഷം സംസ്ഥാനത്ത് ചരിഞ്ഞത്. 2017ൽ 20 ഉം 2016ൽ 26ഉം ആനകൾ ചരിഞ്ഞു. പരിപാലനത്തിലെ മാ​റ്റമാണ് എരണ്ടകെട്ടിനു കാരണമായി ആനചികിത്സകരും ആനപ്രേമികളും പറയുന്നത്. കാട്ടാനകൾക്ക് ഈ പ്രശ്നം ഇല്ല. ആറേഴുമാസമായി​ ആനകളെല്ലാം സമ്പൂർണവി​ശ്രമം തന്നെ. പനംപട്ടയ്ക്കു പകരം ഈർപ്പമുള്ള ഇലകൾ കൂടുതലായി കൊടുക്കണമെങ്കിലും അതും നടപ്പാവുന്നില്ല. പനംപട്ടയും തെങ്ങോലയുമാണ് മുഖ്യാഹാരം.

എരണ്ടകെട്ട്

പിണ്ടം പുറത്തേക്ക് പോകാത്ത അവസ്ഥ. ഏഴെട്ടു മീ​റ്റർ നീളമുള്ള ആനയുടെ കുടലിലൂടെ കടന്നുപോകുന്ന തീ​റ്റ ഏതെങ്കിലും ഭാഗത്ത് തടസം നേരിട്ടാൽ പിന്നീട് നീങ്ങാതെ വരും. ഉരുളകളായി മാറുന്ന തീ​റ്റ നീങ്ങാതാകുന്നതോടെ ദഹന പ്രക്രിയ പാടെ തെറ്റും. പിന്നീട് ഭക്ഷണം കഴിക്കാതെ പെട്ടെന്ന് തളർച്ചയിലേക്കു മാറും. വയറിളക്കം കൂടി ആയാൽ ജലാംശം കുറഞ്ഞ് ആന വീണുപോകും.

ജീവി​തരീതി​ മാറ്റണം വ്യായാമക്കുറവ് കൂടാതെ വാഹനങ്ങളിൽ ആനയെ കൊണ്ടു പോകുമ്പോഴുണ്ടാകുന്ന വായു കോപവും, ഭക്ഷണത്തിലെ മാറ്റങ്ങളും, നാരുള്ള ഭക്ഷണങ്ങളുടെ കുറവും എരണ്ടകെട്ട് വർദ്ധിപ്പിക്കുന്നുണ്ട്.

ഡോ.സുനിൽകുമാർ

ആന ചികിത്സകൻ,

ഫെലിക്കൻ പെറ്റ് ഹോസ്പിറ്റൽ

തൃപ്പൂണിത്തുറ