കൊച്ചി : കൊവിഡ് പ്രതിരോധ പ്രവർത്തനങ്ങൾ വിലയിരുത്തുന്നതിന് കേന്ദ്ര ആരോഗ്യ വകുപ്പ് പ്രതിനിധിസംഘം ജില്ലയിൽ സന്ദർശനം നടത്തി.തിരുവനന്തപുരം റീജിയണൽ ആരോഗ്യ കുടുംബക്ഷേമ കേന്ദ്രം ഡെപ്യൂട്ടി ഡയറക്ടർ ഡോ. രുചി ജെയിൻ, സഫ്ദർജംഗ് ആശുപത്രിയിലെ റെസ്പിറേറ്ററി വിഭാഗം അദ്ധ്യാപകനായ ഡോ.നീരജ് കുമാർ ഗുപ്ത എന്നിവരാണ് ജില്ലയിൽ പരിശോധന നടത്തിയത്. ജില്ലാതല അവലോകന യോഗത്തിനുശേഷം കൊവിഡ് അപെക്‌സ് കേന്ദ്രമായ എറണാകുളം പി. വി. എസ് ആശുപത്രി, ഐ. സി 4 കേന്ദ്രം (കൊവിഡ് ട്രാൻസ്പോർട്ടേഷൻ നെറ്റ്വർക്ക് ), അങ്കമാലി താലൂക്ക് ആശുപത്രി, ഡോൺ ബോസ്‌കോ ബോയ്‌സ് ഹോം, അഡ്‌ലക്‌സ് എസ്. എൽ. ടി. സി, തുറവൂർ പ്രാഥമിക ആരോഗ്യ കേന്ദ്രം, അങ്കമാലി താലൂക്ക് ആശുപത്രി തുടങ്ങിയ സ്ഥലങ്ങളിൽ നേരിട്ട് സന്ദർശിച്ച് വിലയിരുത്തൽനടത്തി. ആരോഗ്യ വകുപ്പ് ഉദ്യാഗസ്ഥരും കലക്ടർക്കൊപ്പം കേന്ദ്ര സംഘവുമായുള്ള ചർച്ചകളിൽ പങ്കെടുത്തു.

കൊവിഡ് പ്രതിരോധത്തിന്റെ ആദ്യനാളുകൾ മുതൽ ജില്ലയിൽ നടത്തിയ പ്രവർത്തനങ്ങൾ കളക്ടർ എസ്. സുഹാസ് സംഘത്തിന് മുന്നിൽ അവതരിപ്പിച്ചു. വിമാനത്താവളം, റെയിൽവേ സ്റ്റേഷൻ തുടങ്ങിയ സ്ഥലങ്ങളിൽ കൊവിഡ് നിയന്ത്രണത്തിന്റെ ഭാഗമായി നടത്തിയ പ്രവർത്തനങ്ങൾ, ലോക്ക് ഡൗണിനോട് അനുബന്ധിച്ചു നടത്തിയ വന്ദേഭാരത്, ശ്രമിക് ട്രെയിൻ മിഷനുകൾ, കമ്മ്യൂണിറ്റി കിച്ചൻ പ്രവർത്തനങ്ങൾ, കോൺടാക്ട് ട്രൈസിംഗ് തുടങ്ങിയവയും ലോക്ക് ഡൗണിന് ഇളവുകൾ പ്രഖ്യാപിച്ചശേഷം നടത്തിയ പ്രവർത്തനങ്ങളും നിരീക്ഷണ സംവിധാനങ്ങളും സംസ്ഥാനത്ത് ആദ്യമായി പ്രവർത്തനം ആരംഭിച്ച എഫ്. എൽ. ടി. സി, എസ്. എൽ. ടി. സി കളുടെ പ്രവർത്തനരീതിയും കൊവിഡ് പ്രതിരോധരീതിയും കളക്ടർ വിശദീകരിച്ചു നൽകി.