ആലുവ: 'പ്രേമം' സിനിമയുടെ ലൊക്കേഷനായതോടെ 'പ്രേമം' പാലം എന്ന പേരിൽ അറിയപ്പെടുന്ന ഉളിയന്നൂരിലേക്കുള്ള അക്വഡക്റ്റ് വിനോദ സഞ്ചാരം ലക്ഷ്യമിട്ട് നവീകരിക്കും. മാർക്കറ്റ് മുതൽ യു.സി കോളേജ് വരെയുള്ള 2.250 കിലോമീറ്റർ അക്വഡേറ്റ് സൗന്ദര്യവത്കരിക്കുന്നതിന് 50 ലക്ഷം രൂപയുടെ പദ്ധതി നേരത്തേ തയ്യാറാക്കിയെങ്കിലും കൊവിഡ് പ്രതിസന്ധി മൂലം മുടങ്ങിയതാണ്.
രണ്ട് എം.പിമാരും രണ്ട് എം.എൽ.എമാരും സഹായം വാഗ്ദാനം ചെയ്തിട്ടുണ്ട്. 10 ലക്ഷം ജില്ലാ പഞ്ചായത്ത് അനുവദിച്ചിട്ടുണ്ടെന്ന് വൈസ് പ്രസിഡന്റ് ബി.എ. അബ്ദുൾ മുത്തലിബ് പറഞ്ഞു. തിരഞ്ഞെടുപ്പ് വിജ്ഞാപനത്തിന് മുമ്പ് നിർമ്മാണോദ്ഘാടനം നടത്താനാണ് ശ്രമം.
ആദ്യഘട്ടമായി പാലം ടൈൽ വിരിച്ചും കൈവരി കെട്ടിയും മനോഹരമാക്കും. ആലുവ മീഡിയ ക്ളബിൽ മാദ്ധ്യമപ്രവർത്തകരുമായി സംസാരിക്കുകയായിരുന്നു അദ്ദേഹം.
1965ൽ പറവൂർ ഭാഗത്തേക്ക് വെള്ളം കൊണ്ടുപോകുന്നതിനായി സ്ഥാപിച്ചതാണെങ്കിലും ഉദ്ദേശ്യം നടന്നില്ല. പിന്നീട് ഉളിയന്നൂർ ദ്വീപ് നിവാസികൾ വഴിയായി ഉപയോഗിക്കുകയായിരുന്നു. മൂന്ന് മീറ്ററാണ് വീതി.
ആലുവ ജില്ലാ ആശുപത്രിക്ക് സൗരോർജ്ജ പദ്ധതി
ആറ് ലക്ഷത്തോളം രൂപ പ്രതിമാസം വൈദ്യുതിക്ക് ചെലവഴിക്കുന്ന ആലുവ ജില്ലാ ആശുപത്രിയിൽ 40 ലക്ഷം രൂപ ചെലവിൽ സോളാർ പാനൽ സ്ഥാപിക്കുമെന്ന് അബ്ദുൾ മുത്തലിബ് പറഞ്ഞു.
ഉടൻ നിർമ്മാണം ആരംഭിക്കും. അധികമുള്ള വൈദ്യുതി കെ.എസ്.ഇ.ബിക്ക് നൽകും. ആശുപത്രിയുടെ കുടിവെള്ള ചെലവ് കുറയ്ക്കാനായി വലിയ കിണറും നിർമ്മിക്കും.
ജില്ലാ പഞ്ചായത്ത് നേട്ടങ്ങൾ