കോലഞ്ചേരി: അപകട പരമ്പരയൊരുക്കുന്ന എം.സി റോഡ് മണ്ണൂരിലെ അന്നപൂർണ ജംഗ്ഷനിലും കിഴക്കെ കവലയിലും അപകട വളവെന്ന മുന്നറിയിപ്പിനായി ഇരു വശത്തുനിന്നും എത്തുന്ന വാഹന ഡ്രൈവർമാർക്ക് കാണത്തക്ക വിധം മിന്നുന്ന മഞ്ഞ ലൈ​റ്റും അപകടമേഖല എന്ന് എഴുതിയ സിഗ്നലും സ്ഥാപിക്കുന്നതിനുള്ള നടപടികൾ പൂർത്തിയായി .അടുത്ത ആഴ്ച്ച നിർമ്മാണം തുടങ്ങും.കോഴിക്കോടുള്ള കമ്പനിയാണ് ടെണ്ടർ എടുത്തിരിക്കുന്നത്. ഇതുമായി ബന്ധപ്പെട്ട് കേരളകൗമുദി നിരവധി വാർത്തകൾ നല്കിയിരുന്നു. 2019 ജൂലായ് മാസത്തിലാണ് സിഗ്നൽ സ്ഥാപിക്കുന്നതിനായി മൂവാ​റ്റുപുഴ എക്‌സികുട്ടീവ് എൻജിനീയർക്ക് പഞ്ചായത്തംഗം ധന്യ ജയശേഖർ നിവേദനവും നൽകി. സി.പി.എം ജില്ലാ നേതൃത്വം പൊതുമരാമത്ത് മന്ത്രിയുടെ മുന്നിൽ പ്രശ്‌നം അവതരിപ്പിക്കുകയും ചെയ്തിരുന്നു. ഇതേ തുടന്ന് മന്ത്രി മൂവാ​റ്റുപുഴ പൊതുമരാമത്ത് എക്‌സിക്യുട്ടീവ് എൻജിനീയർക്ക് ഇത് സംബന്ധിച്ച് നിർദേശം നൽകിയിരുന്നു.

അപകടകാരണം റോഡിലെ വളവ്

മൂവാ​റ്റുപുഴ ഭാഗത്തുനിന്നും പെരുമ്പാവൂരിലേയ്ക്ക് പോകുന്ന വാഹനങ്ങളിലെ ഡ്രൈവർമാർക്ക് എം.സി റോഡിലേയ്ക്ക് കടക്കുന്ന വാഹനങ്ങളെ വളവിലെത്തുമ്പോൾ മുൻകൂട്ടി കാണാൻ കഴിയാതെ വരുന്നതാണ് അപകടങ്ങളുണ്ടാക്കുന്നത്. വളവുതിരിഞ്ഞ് വരുമ്പോഴാകും വാഹനങ്ങൾ ശ്രദ്ധയിൽപെടുന്നത്. പെട്ടെന്നുള്ള ബ്രേക്കിടലും വാഹനം വെട്ടിച്ചുമാ​റ്റാനുള്ള ശ്രമവും അപകടത്തിൽ കലാശിക്കുന്നു. ഈ റോഡിലെ അപകടകരമായ വളവുകളെക്കുറിച്ചറിയാതെ എത്തുന്ന വാഹനങ്ങളാണ് അപകടമുണ്ടാക്കുന്നത്.

അന്നപൂർണ ജംഗ്ഷനിൽ കാഴ്ച മറയ്ക്കുന്ന വളവ്

ഇവിടുത്തെ കാഴ്ച മറയ്ക്കുന്ന വളവുകളാണ് അപകടങ്ങൾക്കിടയാക്കുന്നത്.ആധുനിക നിലവാരത്തിൽ പണി പൂർത്തിയാക്കിയതാണ് എം.സി റോഡ്. എന്നാൽ നിർമ്മാണകാലത്തു തന്നെ അപകടകരമായ വളവുകളാണ് റോഡിൽ നിരവധി ജീവനുകൾ പൊലിയുന്നതിനു കാരണമാകുന്നത്. അതിലൊന്നാണ് അന്നപൂർണ ജംഗ്ഷനിലേത്. നെല്ലാട് നിന്നുള്ള റോഡ് വന്നുകയറുന്ന എം.സി റോഡിലെ ജംഗ്ഷനാണിത്. സമാനമായ രീതിയിലാണ് കിഴക്കെകവലയിലും. എം.സി റോഡിൽ നിന്നും വെങ്ങോല,പോഞ്ഞാശേരി റോഡിലേയ്ക്ക് കയറുന്ന ജംഗ്ഷനാണിത്. രണ്ടിടത്തും കാഴ്ച മറയ്ക്കുന്ന വളവുകളാണ്.