കൊച്ചി: സംയോജിത നഗര പുനരുജ്ജീവനവും ജലഗതാഗത സംവിധാന പദ്ധതിയും സംബന്ധിച്ച് കൊച്ചി മെട്രോ റെയിൽ ലിമിറ്റഡിന്റെ നേതൃത്വത്തിൽ ബെറ്റർ കൊച്ചി റെസ്‌പോൺസ് ടീമുമായി യോഗം ചേർന്നു. മാലിന്യ നിർമാർജനത്തിന് ആവശ്യമായ സംവിധാനങ്ങളെക്കുറിച്ച് ചർച്ച ചെയ്തു.
പദ്ധതിയുടെ സാങ്കേതിക വശങ്ങളെക്കുറിച്ചും വെല്ലുവിളികളെക്കുറിച്ചും കെ.എം.ആർ.എൽ അധികൃതർ വ്യക്തമാക്കി. ബെറ്റർ കൊച്ചി റെസ്‌പോൺസ് ഗ്രൂപ്പ് പ്രസിഡന്റ് എസ്.ഗോപകുമാർ പങ്കെടുത്തു. മാലിന്യ നിർമാർജനവുമായി ബന്ധപ്പെട്ട നൂതന വിദ്യകളെക്കുറിച്ച് അദ്ദേഹം വിശദീകരിച്ചു.
പദ്ധതി നടത്തിപ്പിന് കെ.എം.ആർ.എൽ എം.ഡി അൽകേഷ് കുമാർ ശർമ പ്രൊഫഷണൽ സംഘങ്ങളുടെ വൈദഗ്ധ്യം സ്വാഗതം ചെയ്യുന്നതായി അറിയിച്ചു. പൊതുജനങ്ങൾ, ജനപ്രതിനിധികൾ, ഗവണ്മെന്റ് സ്ഥാപനങ്ങൾ, എൻ.ജി.ഒകൾ തുടങ്ങിയവർക്ക് അഭിപ്രായങ്ങൾ അറിയിക്കാം. ബി.കെ.ആർ.ജി. സെക്രട്ടറി ഷിർലി ചാക്കോ, വേണുഗോപാൽ ഗോവിന്ദ്, എലിസബത്ത്, അനിൽജോസഫ്, എ.സി.കെ നായർ എന്നിവർ പങ്കെടുത്തു.