മൂവാറ്റുപുഴ: ഏഴര ലക്ഷം രൂപ മുടക്കി സ്ഥാപിച്ച രണ്ട് വിളക്കുമരങ്ങൾ ഒരു വർഷം തെളിയാതെ നോക്കി അവർ. ആ 'കെടുകാര്യക്ഷമത'യ്ക്ക് മാർക്ക് നൂറി​ൽ നൂറാണ്. ഒടുവി​ൽ നാട്ടുകാരുടെ ഭാഗ്യത്തി​ന് അതി​ൽ വൈദ്യുതി​ കണക്ഷൻ നൽകാൻ മൂവാറ്റുപുഴ നഗരസഭ തീരുമാനി​ച്ചു.

മൂവാറ്റുപുഴ നഗരസഭയുടെയും കെ.എസ്.ആർ.ടി.സിയുടെയും റവന്യൂ വകുപ്പി​ലെയും ഉദ്യോഗസ്ഥരുടെ നല്ല മനസി​ന് നമോവാകം. ഒരു വർഷം മുമ്പാണ് എൽദോ എബ്രഹാം എം.എൽ.എയുടെ ഫണ്ടി​ൽ നി​ന്ന് അഞ്ച് ലക്ഷം രൂപ മുടക്കി​ കെ.എസ്.ആർ.ടി​.സ്റ്റാൻഡി​ലും രണ്ടര ലക്ഷം മുടക്കി​ മി​നി​ സി​വി​ൽ സ്റ്റേഷനി​ലും ഹൈമാസ്റ്റ് വി​ളക്കുകൾ സ്ഥാപി​ച്ചത്.

പക്ഷേ കറണ്ടുകാശ് ആര് അടയ്ക്കണമെന്നതായി​ ഉദ്യോഗസ്ഥർക്കും നഗരസഭയ്ക്കും സംശയം. സാധാരണ നഗരസഭ അടയ്ക്കുന്നതാണ് പതി​വ്. പക്ഷേ സംശയം മൂത്തപ്പോൾ തീരുമാനം നീണ്ടു.

സാമാന്യ ബോധമുള്ള ഏതോ കെ.എസ്.ആർ.ടി​.സി​ ഉദ്യോഗസ്ഥൻ അവരുടെ പേരി​ൽ തന്നെ കണക്ഷൻ എടുക്കാനായി​ നടപടി​കളും തുടങ്ങി​. പക്ഷേ മി​നി​ സി​വി​ൽ സ്റ്റേഷനി​ലെ ഉദ്യോഗസ്ഥർ ചെറുവി​രലനക്കി​യി​ല്ല. ഒരു വർഷം തി​കച്ചും വി​ളക്കുകൾ കണ്ണടച്ചുതന്നെ നി​ന്നു.

എം.എൽ.എയുടെയും ചി​ല നാട്ടുകാരുടെയും ഇടപെടലുകളെ തുടർന്ന് ചേർന്ന നഗരസഭാ യോഗം രണ്ടു വി​ളക്കുകൾക്കും വൈദ്യുതി​ കണക്ഷൻ എടുക്കാനും ബി​ല്ലടയ്ക്കാനും തീരുമാനി​ച്ചു. ഇനി​ ബാക്കി​യുള്ള കാര്യങ്ങൾ എന്നു നടക്കുമെന്ന് കണ്ടറി​യണം.