കിഴക്കമ്പലം: സംസ്ഥാനത്തെ രാഷ്ട്രീയ രംഗത്ത് പുത്തൻ പരീക്ഷണവുമായി വന്ന് വിജയംവരിച്ച കിഴക്കമ്പലത്തെ സാംസ്ക്കാരിക സംഘടന ട്വന്റി 20 അടുത്ത ഘട്ടത്തിലേക്കിറങ്ങി. സമീപ പഞ്ചായത്തുകൾ കൈപ്പിടിയിലൊതുക്കുകയാണ് ലക്ഷ്യം.

കഴിഞ്ഞ തദ്ദേശഭരണ തിരഞ്ഞെടുപ്പിന് തൊട്ടു മുമ്പാണ് ആഗോള ബിസിനസ് രംഗത്ത് പ്രമുഖരായ കിഴക്കമ്പലത്തെ അന്ന, കിറ്റെക്സ് ഗ്രൂപ്പുകളുടെ സാരഥികളിലൊരാളായ സാബു. എം ജേക്കബിന്റെ നേതൃത്വത്തിൽ കിഴക്കമ്പലം പഞ്ചായത്തിൽ ട്വന്റി 20 ഉദയം ചെയ്തത്. അന്ന് രാഷ്ട്രീയ കക്ഷി സ്ഥാനാർത്ഥികളെ വേരോടെ പിഴുതെറിഞ്ഞ് 19 ൽ 17 സീ​റ്റ് പിടിച്ചെടുത്തായിരുന്നു അരങ്ങേ​റ്റം. പഞ്ചായത്ത് ഭരണത്തിൽ പ്രൊഫഷണലിസം എങ്ങിനെ നടപ്പാക്കാമെന്ന് തെളിയിച്ചാണ് രണ്ടാം ഘട്ടത്തിൽ സമീപ പഞ്ചായത്തുകളിലേക്കുള്ള പ്രവേശനം. മഴുവന്നൂർ, ഐക്കരനാട്, കുന്നത്തുനാട്, വെങ്ങോല പഞ്ചായത്തുകളിൽ സാന്നിദ്ധ്യം ഉറപ്പിച്ചുകഴിഞ്ഞു. ഇവിടെ 25,248 കുടുംബങ്ങളിലെ 1.08 ലക്ഷം പേർ നിലവിൽ ട്വന്റി 20യിൽ അംഗത്വമെടുത്തു കഴിഞ്ഞു. കിഴക്കമ്പലം പഞ്ചായത്തിലെ 8,738 കുടുംബങ്ങളിലെ 35,586 അംഗങ്ങളെ കൂടാതെയാണിത്. ഇതുവരെ 1.33 ലക്ഷം പേർ ട്വന്റി 20 കുടുംബത്തിലുണ്ടെന്ന് ചീഫ് കോഓർഡിനേ​റ്റർ സാബു എം. ജേക്കബ് പറഞ്ഞു.

മഴുവന്നൂർ, ഐക്കരനാട് പഞ്ചായത്തുകളിലെ മുഴുവൻ വാർഡുകളിലും ട്വന്റി 20 സാന്നിദ്ധ്യമുണ്ട്.

കുന്നത്തുനാട് പഞ്ചായത്തിലെ 18 വാർഡുകളിൽ 14 ലും, വെങ്ങോല പഞ്ചായത്തിലെ 23ൽ 9ലും അംഗങ്ങളെ ചേർത്തു. അംഗത്വവിതരണം തുടരുകയാണ്.

എല്ലാ പഞ്ചായത്തുകളിലും ഇടതു, വലതു, ബി.ജെ.പി മുന്നണികൾക്ക് കാതങ്ങൾ മുന്നേ ട്വന്റി 20 തിരഞ്ഞെടുപ്പ് പ്രചാരണവും തുടങ്ങി. കിഴക്കമ്പലത്ത് ജില്ലാ, ബ്‌ളോക്ക് പഞ്ചായത്ത് സ്ഥാനാർത്ഥികളെയും പ്രഖ്യാപിച്ചു.

സമീപ പഞ്ചായത്തുകളിലേക്കുള്ള കടന്നു കയറ്റത്തെ രാഷ്ട്രീയ മുന്നണികൾ അങ്കലാപ്പോട‌െയാണ് കാണുന്നത്. മേഖലയിലെ രാഷ്ട്രീയപാർട്ടികളുടെ നിലനില്പു പോലും അപകടത്തിലാകുന്ന വിധമാണ് സംഘടനയുടെ മുന്നേറ്റം.

അരാഷ്ട്രീയമായ സംഘടന പഞ്ചായത്തുകളിൽ പിടിമുറുക്കുന്നത് ജില്ലയിലെ രാഷ്ട്രീയ മുന്നണികളെയും പ്രതിസന്ധിയിലാക്കും.

സംസ്ഥാനത്ത് നിരവധി പഞ്ചായത്തുകളിലും, കോർപ്പറേഷൻ, മുനിസിപ്പാലിറ്റികളിലും 'കിഴക്കമ്പലം മോഡൽ' പരീക്ഷണം തുടങ്ങി കഴിഞ്ഞു. ഇതേ മാതൃക പിന്തുടർന്ന് പോരാട്ടത്തിനൊരുങ്ങുന്നത് വേറെ വേറെ സംഘടനകളാണ്.കിഴക്കമ്പലത്തെത്തി കാര്യങ്ങൾ പഠിച്ച് മടങ്ങിയാണ് ഇവർ തിരഞ്ഞെടുപ്പ് ഗോദയിലേക്കിറങ്ങുന്നത്.

ആധുനിക നിലവാരത്തിലെ റോഡുകൾ, കുടിവെള്ള പദ്ധതികൾ, സ്വയംതൊഴിൽ സംരംഭങ്ങൾ, ലക്ഷം വീടുകളെ ലക്ഷ്വറി വീടുകളാക്കി മാ​റ്റിയ പദ്ധതി, എല്ലാ കുടുംബങ്ങൾക്കും പകുതിയിലധികം വിലക്കുറവിൽ നിത്യോപയോഗ സാധനങ്ങൾ നൽകാൻ മാർക്കറ്റ്,

പാവപ്പെട്ടവർക്ക് വീടുകൾ, മുഴുവൻ വീടുകളിലും ശൗചാലയങ്ങൾ, മുഴുവൻ സർക്കാർ സ്‌കൂളുകളും ഹൈടെക്. ആയിരത്തിലധികം ഏക്കർ തരിശുനിലങ്ങളിൽ കൃഷി. പഞ്ചായത്ത് ഓഫീസിനും പ്രവർത്തനങ്ങൾക്കും ആധുനിക മുഖം തുടങ്ങി കിഴക്കമ്പലം പഞ്ചായത്തിലെ പദ്ധതികൾ നിരവധിയാണ്.