കൊച്ചി: സ്റ്റാർട്ടപ്പ് സംരംഭങ്ങളിൽ വനിതകളുടെ പ്രാതിനിദ്ധ്യവും പങ്കാളിത്തവും പ്രോത്സാഹിപ്പിക്കുന്നതിന്റെ ഭാഗമായി കേരള സ്റ്റാർട്ടപ്പ് മിഷൻ സംഘടിപ്പിക്കുന്ന വനിതാ സ്റ്റാർട്ടപ്പ് ഉച്ചകോടി 31ന് ആരംഭിക്കും.

ഷീ ലവ്‌സ് ടെക് ഇന്ത്യ 2020 എന്ന പേരിൽ വെർച്വലായാണ് ഉച്ചകോടി സംഘടിപ്പിക്കുന്നത്. പങ്കെടുക്കേണ്ടവർ https://startupmission.in/womensummit എന്ന വെബ്‌സൈറ്റിൽ രജിസ്റ്റർ ചെയ്യണം. ഇതിന് മുന്നോടിയായുള്ള ഹാക്കത്തൺ, പിച്ചിംഗ് മുതലായ വിവിധ സെഷനുകൾക്ക് തുടക്കമായി.
സ്റ്റാർട്ടപ്പ് ഇന്ത്യ, ടൈ കേരള, കോൺഫെഡറേഷൻ ഒഫ് ഇന്ത്യൻ ഇൻഡസ്ട്രീസിന്റെ (സി.ഐ.ഐ) വനിതാ വിഭാഗമായ ഇന്ത്യൻ വുമൺ നെറ്റ്‌വർക്ക് എന്നിവ ഉച്ചകോടിയിൽ പങ്കാളികളാകും. സ്ത്രീകളും സാങ്കേതികവിദ്യയും എന്നതാണ് ഉച്ചകോടിയുടെ പ്രമേയം.
സ്ത്രീകളുടെ ജീവിതത്തെ സ്വാധീനിച്ച സംരംഭങ്ങളെയും ഉത്പന്നങ്ങളെയും ഷീ ലവ്‌സ് ടെക് ഇന്ത്യ 2020 യിലേക്ക് തിരഞ്ഞെടുത്തിട്ടുണ്ട്. ഇതിന്റെ ദേശീയ ഗ്രാൻഡ് ചലഞ്ച് ഉച്ചകോടിയിടെ ഭാഗമായി നടക്കും. ഷീ ലവ്‌സ് ടെക് ഇന്ത്യ 2020 വിജയി, മികച്ച ഇൻക്ലുസീവ് ഇൻകബേറ്റർ, മികച്ച ഇൻക്ലുസീവ് സ്റ്റാർട്ടപ്പ്, മികച്ച ഇൻക്ലൂസീവ് ഐ.ഇ.ഡി.സി പുരസ്‌കാരങ്ങളും ഉച്ചകോടിയിൽ നൽകും.
കൊവിഡ് കാലത്ത് പ്രൊഫഷണലുകളും ഫ്രീലാൻസ് ജോലികളും കരാർ ജോലികളും വിജയകരമായി ചെയ്തുവരുന്നുണ്ട്. സ്വകാര്യജീവിതവും പഠനവും മറ്റും ബാധിക്കാത്ത രീതിയിൽ ജോലിചെയ്യാവുന്ന സാഹചര്യങ്ങളുടെ പശ്ചാത്തലത്തിൽ നടക്കുന്ന ഉച്ചകോടിയിൽ ഇത്തരം വിഷയങ്ങളും പരാമർശിക്കപ്പെടുമെന്ന് സംഘാടകർ അറിയിച്ചു.