# യുവതി അടക്കം രണ്ടുപേർക്കായി തെരച്ചിൽ
# ഇന്നോവ കാർ കണ്ടെത്തി

തൃക്കാക്കര: കൊല്ലം ഓയൂർ രേവതി വീട്ടിൽ ദിവാകരൻ നായരുടെ (64) മരണത്തിൽ ബന്ധുവടക്കം മൂന്നുപേരെ ഇൻഫോപാർക്ക് പൊലീസ് കസ്റ്റഡിയിലെടുത്തു.കൊലപാതകമാണെന്ന നിഗമനത്തിൽ തന്നെയാണ് പൊലീസിന്റെ അന്വേഷണം മുറുകുന്നത്.

ഇൻഫോപാർക്ക് പൊലീസ് കൊല്ലം, കോട്ടയം മേഖലകൾ കേന്ദ്രീകരിച്ചാണ് അന്വേഷണം നടത്തുന്നത്. കോട്ടയത്തെ പൊൻകുന്നത്തുനിന്നുമാണ് മൂവരെയും കസ്റ്റഡി​യിൽ എടുത്തത്.

മൊബൈൽ വി​ളി​കൾ കേന്ദ്രീകരിച്ചുനടത്തിയ അന്വേഷണത്തിൽ മരണത്തിന് പിന്നിൽ ക്വട്ടേഷൻ സംഘത്തിന് പങ്കുളളതായും സൂചനയുണ്ട്. ദിവാകരൻ നായരുടെ അടുത്ത ബന്ധുവാണ് ക്വട്ടേഷന് പി​ന്നി​ൽ. ഇയാളും ദൗത്യം ഏറ്റെടുത്ത പൊൻകുന്നം സ്വദേശികളായ രണ്ടുപേരുമാണ് കസ്റ്റഡിയിലുള്ളത്.

സ്ഥലവില്പന നടത്തുന്നതിനെ ചൊല്ലി​ ബന്ധുക്കളുമായുള്ള ദി​വാകരൻ നായരുടെ തർക്കും കൈയേറ്റത്തിൽ കലാശിച്ചിരുന്നു.

സംഘത്തിൽ മലപ്പുറം സ്വദേശിനിയും

മരണത്തിന് മുമ്പുളള ദിവസങ്ങളിൽ മലപ്പുറം സ്വദേശിനിയായ യുവതി ദി​വാകരൻ നായരെ പലതവണ വിളിച്ചതായി അന്വേഷണസംഘം കണ്ടെത്തി. പിടിയിലായ ഒരാളുമായി 19 പ്രാവശ്യം യുവതി​ സംസാരി​ച്ചി​ട്ടുണ്ട്.

കാസർകോഡ് സ്വദേശിയുടെ നേതൃത്വത്തിൽ ക്വട്ടേഷൻ സംഘം മലപ്പുറം സ്വദേശിനിയെ ഉപയോഗിച്ച് ഹണി ട്രാപ്പിലൂടെയാണ് കാക്കനാട് വിളിച്ചുവരുത്തിയതെന്ന് സൂചനയുണ്ട്. എന്നാൽ യുവതി സംഭവ ദിവസം കാക്കനാട് എത്തി​യതുമി​ല്ല.

ഇന്നോവ കണ്ടെത്തി

ദിവാകരൻ സഞ്ചരിച്ച ഓട്ടോയെ പിന്തുടർന്ന ഇന്നോവ കാർ ഇന്നലെ കോട്ടയത്തുനിന്ന് അന്വേഷണസംഘം കണ്ടെത്തി. ഈ കാറിലായിരുന്നു ക്വട്ടേഷൻ സംഘം ദിവാകരനെ പിന്തുടർന്നത്.