ചെങ്കുളം: സംസ്ഥാന യുവജനക്ഷേമ ബോർഡിന്റെയും ദേശീയ സാഹസിക അക്കാദമിയുടെയും ആഭിമുഖ്യത്തിൽ വോളിന്ററി യൂത്ത് ആക്ഷൻ ഫോഴ്‌സ് അംഗങ്ങൾക്ക് സ്‌കൂബ ഡൈവിംഗ് പരിശീലനം ആരംഭിച്ചു. രണ്ട് ദിവസങ്ങളിലായി ചെങ്കുളം ബോട്ടിംഗ് സെന്ററിൽ നടക്കുന്ന പരിശീലന പരിപാടി മന്ത്രി എംഎം മണി ഉദ്ഘാടനം ചെയ്തു. വെള്ളപൊക്ക ദുരന്ത സമയങ്ങളിൽ സ്‌കൂബ ഡൈവിംഗ് ടീമിന്റെ സഹകരണം ഏറെ പ്രധാനപ്പെട്ടതാണെന്നും മന്ത്രി പറഞ്ഞു. ചടങ്ങിൽ ദേവികുളം എം എൽ എ എസ് രാജേന്ദ്രൻ അദ്ധ്യക്ഷത വഹിച്ചു. ജില്ലാ കോർഡിനേറ്റർ വി സിജിമോൻ സ്വാഗതവും ജില്ലാ യൂത്ത് പ്രോഗ്രാം ഓഫീസർ വി എസ് ബിന്ദു നന്ദിയും പറഞ്ഞു.
.ജില്ലയിലെ പരിശീലനം ലഭിച്ചിട്ടുള്ള വോളന്റിയർമാരിൽ നിന്നും തിരഞ്ഞെടുത്ത 50 വോളന്റിയർമാർക്കാണ് ഇപ്പോൾ ഡൈവിംഗിനുള്ള പ്രാഥമിക പരിശീലനം നൽകുന്നത്. സംസ്ഥാനത്തുതന്നെ ആദ്യമായാണ് ഇത്തരത്തിൽ വോളന്ററി യൂത്ത് ആക്ഷൻ ഫോഴ്‌സിന് പ്രത്യേക പരിശീലനം നൽകുന്നത്. സ്‌കൂബ ഡൈവിംഗിന്റ പ്രാഥമിക പരിശീലം വിജയകരമായി പൂർത്തിയാക്കുന്നവർക്കായി അഡ്വാൻസ്ഡ് ട്രെയിനിംങും പിന്നീട് നടത്താനാണ് തീരുമാനം. 5 പേരുടെ പ്രത്യേക ടീമുകളായി തിരിഞ്ഞാണ് ഡൈവിംഗ് പരിശീലനം. സിറാജ്, ജിബിൻ സ്‌കറിയ, ബിജുകുമാർ,നിഖിൽദാസ് തുടങ്ങിയവരുടെ നേതൃത്വത്തിലാണ് രണ്ടു ദിവസത്തെ പരിശീലനം നടക്കുക. സ്‌കൂബ ടിം അംഗങ്ങൾക്കുള്ള സാങ്കേതിക സംവിധാനങ്ങളും എത്തിച്ചാണ് പരിശീലനം.