ഇടുക്കി: എല്ലാ ഗ്രാമീണ ഭവനങ്ങൾക്കും 2024 ഓടു കൂടി കുടിവെള്ളം എത്തിക്കുന്നതിനു കേന്ദ്ര സംസ്ഥാന സർക്കാരുകളുടെ ധനസഹായത്തോടെ ആരംഭിക്കുന്ന ജലജീവൻ മിഷൻ പദ്ധതിയുടെ സംസ്ഥാനതല പ്രവർത്തനോദ്ഘാടനം ഇന്ന് വൈകിട്ട് 3.30ന് മുഖ്യമന്ത്രി പിണറായി വിജയൻ വീഡിയോ കോൺഫറൻസ് വഴി നിർവഹിക്കും. ജില്ലയിലെ പ്രവർത്തനോദ്ഘാടനം ഇരട്ടയാർ ഗ്രാമപഞ്ചായത്ത് കോൺഫ്രൻസ് ഹാളിൽ മന്ത്രി എം.എം.മണി ഓൺലൈനിൽ നിർവഹിക്കും. ഡീൻ കുര്യാക്കോസ് എം.പി , എം.എൽ.എമാരായ പി ജെ ജോസഫ്, റോഷി അഗസ്റ്റിൻ, എസ് .രാജേന്ദ്രൻ, ഇ.എസ് ബിജിമോൾ, ജില്ലാ പഞ്ചായത്ത് പ്രസിഡന്റ് കൊച്ചുത്രേസ്യ പൗലോസ്, കളക്ടർ എച്ച്. ദിനശേൻ, വാട്ടർ അതോറിറ്റി സൂപ്രണ്ടിങ് എൻജിനീയർ കെ. കെ അനിൽകുമാർ, ഇരട്ടയാർ പഞ്ചായത്ത് പ്രസിഡന്റ് റാണി ജോസഫ് തുടങ്ങിയവർ സംബന്ധിക്കും.

ഈ വർഷം32

പഞ്ചായത്തുകളിൽ

ജില്ലയിൽ 43837 ഗ്രാമീണ ഭവനങ്ങളിലേക്ക് കുടിവെള്ള കണക്ഷൻ നൽകുന്നതിന് 134.51 കോടി രൂപയ്ക്ക് സംസ്ഥാന ജലശുചിത്വ സമിതി ഭരണാനുമതി നൽകി. 2020-21 കാലഘട്ടത്തിൽ 32 പഞ്ചായത്തുകളിലായി 36413 കണക്ഷനുകൾ നൽകാനാണ് ലക്ഷ്യം. ശേഷിക്കുന്ന 1,90,159 ഗ്രാമീണ ഭവനങ്ങൾക്ക് 2024 ഓടു കൂടി കണക്ഷനുകൾ നൽകുവാനാണ് വിഭാവനം ചെയ്യുന്നത്.