വണ്ടിപ്പെരിയാർ : പഞ്ചായത്തിലെ തേങ്ങാക്കല്ലിൽ താത്കാലികമായി നിർമ്മിച്ച നൂറടി പാലം ഗതാഗതത്തിനായി തുറന്നു കൊടുത്തു. പാലത്തിന്റെ ഉദ്ഘാടനം പഞ്ചായത്തു പ്രസിഡന്റ് ശാന്തി ഹരിദാസ് നിർവഹിച്ചു. വണ്ടിപ്പെരിയാർ മ്ലാമല റോഡുകളെ ബന്ധിപ്പിക്കുന്ന തേങ്ങാകല്ലിൽ തുടർ പ്രളയങ്ങൾ മൂലം തകർന്ന നൂറടി പാലത്തിന് സമാന്തരമാതി പഞ്ചായത്തിന്റെ പ്ലാൻ ഫണ്ടിൽ നിന്ന് 20 ലക്ഷം രൂപ ചിലവഴിച്ചാണു പാലത്തിന്റെ നിർമ്മാണം പൂർത്തികരിച്ചത്.പെരിയാറിൽ നിന്ന് മ്ലാമല വഴി തേങ്ങാക്കൽ, കട്ടപ്പന, ഏലപ്പാറ തുടങ്ങിയ പ്രദേശങ്ങളിലേക്ക് എത്തിച്ചേരാനുള്ള എളുപ്പവഴി കൂടിയാണിത്. പുതിയ പാലത്തിന്റെ നിർമ്മാണം പൂർത്തിയാകുന്നതുവരെ യാണ് ഈ പാലം ഉപയോഗിക്കുന്നത്. ഒരു മാസം കൊണ്ടാണു പാലത്തിന്റെ നിർമ്മാണം പൂർത്തിയാക്കിയത്.
വാർഡ് മെമ്പർ ഗീത നേശയ്യൻ അദ്ധ്യക്ഷത വഹിച്ച യോഗത്തിൽ ഗ്രാമപഞ്ചായത്തംഗങ്ങളായ വിജയ ലക്ഷമി, എസ്.എൻ അജിത്, വിവിധ സംഘടനാ പ്രതിനിധികളായ കെ.വി സുരേഷ്, കെ.കെ ചന്ദ്രൻകുട്ടി, കബീർ താന്നിമൂട്ടിൽ, എം.സി വർഗീസ്, ബെന്നി തുടങ്ങിയവർ സംസാരിച്ചു.