തൊടുപുഴ: ഉദ്ഘാടന പരിപാടിയുടെ നോട്ടീസിൽ പാർട്ടി പ്രതിനിധികളുടെ പേര് വയ്ക്കാത്തതിൽ കേരളകോൺഗ്രസ് (എം) ജോസഫ് വിഭാഗത്തിന്റെ പ്രതിഷേധം. ഇളംദേശം ബ്ലോക്ക് പഞ്ചായത്ത് സ്ഥലം അനുവദിച്ച് പി.എം.ജെ.വി.കെ പദ്ധതിയിൽ നിർമ്മിക്കുന്ന സദ്ഭാവന മണ്ഡപ നിർമ്മാണോദ്ഘാടന പരിപാടിയിലാണ് ബ്ലോക്ക് പഞ്ചായത്ത് അംഗവും പാർട്ടി സംസ്ഥാന സ്റ്റിയറിംഗ് കമ്മിറ്റി അംഗവുമായ എം. മോനിച്ചന്റെ നേതൃത്വത്തിൽ പ്രതിഷേധിച്ചത്. ബ്ലോക്ക് പഞ്ചായത്തിന്റെ കോൺഫറൻസ് ഹാളിൽ നടത്തിയ ചടങ്ങിൽ ആലക്കോട് പഞ്ചായത്ത് പ്രസിഡന്റിനെ പങ്കെടുപ്പിക്കാൻ ബ്ലോക്ക് പഞ്ചായത്ത് തീരുമാനിച്ചിരുന്നു. എന്നാൽ ബ്ലോക്ക് പഞ്ചായത്ത് മെമ്പർമാരുടെയും കേരളാ കോൺഗ്രസ് പ്രതിനിധിയുടെയും പേരുകൾ കളക്ടർ നീക്കം ചെയ്തതായാണ് ആക്ഷേപം. ബ്ലോക്കിന് കീഴിൽ ഏഴ് പഞ്ചായത്ത് പ്രസിഡന്റുമാരുള്ളപ്പോൾ വെള്ളിയാമറ്റം പഞ്ചായത്ത് പ്രസിഡന്റിനെ നോട്ടീസിൽ അധികമായി ചേർത്തെന്നും ഇവർ ആരോപിക്കുന്നു. സി.പി.എം, സി.പി.ഐ, കോൺഗ്രസ്, ബി.ജെ.പി, മുസ്ലിംലീഗ് പാർട്ടി പ്രതിനിധികളെ നോട്ടീസിൽ ഉൾപ്പെടുത്തിയിരുന്നു. തുടർന്ന് മോനിച്ചൻ ഈ വിഷയം ഉദ്ഘാടകനായ മന്ത്രി കെ.ടി. ജലീലിന്റെ ശ്രദ്ധയിൽപ്പെടുത്തുകയായിരുന്നു. ചടങ്ങിൽ അദ്ധ്യക്ഷനായിരുന്ന അഡ്വ. ഡീൻ കുര്യാക്കോസ് എം.പിയും കളക്ടറുടെ നടപടിയിൽ പ്രതിഷേധിച്ചു. എന്തുകൊണ്ടാണ് പേര് ഉൾപ്പെടുത്താത്തതെന്ന് പരിശോധിക്കാമെന്നും കളക്ടറോട് ഇക്കാര്യം സംസാരിക്കാമെന്നും മന്ത്രി കെ.ടി. ജലീൽ മറുപടി നൽകി. കേരളാ കോൺഗ്രസ് (എം)​ പാർട്ടിയെ ഉൾപ്പെടുത്താത്ത നടപടിയിൽ കളക്ടറോട് വിശദീകരണം ആരായുമെന്ന് സമ്മേളനം ഉദ്ഘാടനം ചെയ്ത പി.ജെ. ജോസഫ് എം.എൽ.എ പറഞ്ഞു. ജില്ലാ കളക്ടർ ചടങ്ങിൽ പങ്കെടുത്തിരുന്നില്ല.