കാസർകോട്: കേരളത്തിലെ വിവിധ ജില്ലകളിലെ എൽ.പി. സ്കൂളുകളിലെ അദ്ധ്യാപക നിയമനങ്ങൾ നിയമക്കുരുക്കിൽ. ഒഴിവുകളേറെയുണ്ടെങ്കിലും എൽ. പി സ്കൂൾ അദ്ധ്യാപക നിയമനത്തിൽ അപ്രഖ്യാപിത നിരോധനമാണ് ഫലത്തിൽ.
2018 ഡിസംബറിൽ പി.എസ്.സി പ്രസിദ്ധീകരിച്ച റാങ്ക് ലിസ്റ്റ് പ്രകാരം കാസർകോട്, മലപ്പുറം, പാലക്കാട് ജില്ലകളിൽ മാത്രം 1122 ഒഴിവുകൾ നിലവിലുണ്ട്. റിട്ടയർമെന്റ്, സ്ഥലംമാറ്റം ഉൾപ്പെടെ പ്രതീക്ഷിക്കുന്ന 784 ഒഴിവുകളും ചേർത്താൽ ഈ മൂന്നു ജില്ലകളിൽ മാത്രം 2000 ഒഴിവുകൾ വരും.
നിയമനം നടത്തുന്നതിലെ മെല്ലെപ്പോക്കിനെതിരെ ഉദ്യോഗാർത്ഥികൾ കോടതിയെ സമീപിച്ച് അനുകൂല ഉത്തരവ് സമ്പാദിച്ചിട്ടും ഫലമുണ്ടായില്ല. അതിനിടെ സപ്ലിമെന്ററി ലിസ്റ്റിൽ ഉൾപ്പെട്ട ഉദ്യോഗാർത്ഥികൾ കേരള അഡ്മിനിസ്‌ട്രേറ്റീവ് ട്രിബ്യൂണലിനെയും സമീപിച്ചു. റാങ്ക് ലിസ്റ്റ് വിപുലീകരിച്ചു പരമാവധി പേർക്ക് നിയമനം നൽകണമെന്ന് കഴിഞ്ഞ ആഗസ്ത് 24 ന് ട്രിബ്യൂണൽ വിധി പുറപ്പെടുവിക്കുകയും ചെയ്തു. എന്നാൽ ഇതിനെതിരെ പി.എസ്.സി അപ്പീൽ സമർപ്പിച്ചതോടെയാണ് നിയമനം കുരുക്കിലായത്.
പരമാവധി പേർക്ക് നിയമനം നൽകണമെന്നും അപ്പീൽ പോകരുതെന്നും മന്ത്രിയും എം.എൽ.എമാരും ഉൾപ്പെടെ പലരും പറഞ്ഞിട്ടും പി.എസ്. സി ചെവിക്കൊണ്ടില്ലെന്നാണ് ആക്ഷേപം. ഈ ഒഴിവുകൾ തസ്തികയായി കണക്കാക്കുമെന്നും നിയമനത്തിന് സാങ്കേതിക തടസം ഇല്ലെന്നും ഡി.ഡി.ഇ ഓഫീസിൽ നിന്ന് നൽകിയ വിവരാവകാശ രേഖ പറയുമ്പോഴും നിയമനം മാത്രം വൈകുകയാണ്.
നേരത്തെ ഷോർട്ട് ലിസ്റ്റ് വന്നപ്പോൾ തന്നെ കാസർകോട് 300 ഒഴിവുകൾ നിലവിൽ ഉണ്ടായിരുന്നു. ഇതുപ്രകാരം 1050 പേരുടെ റാങ്ക് ലിസ്റ്റ് ഇടേണ്ടതാണ്. എന്നാൽ 294 പേരുടെ ലിസ്റ്റ് മാത്രമാണ് പ്രസിദ്ധീകരിച്ചത്. ബാക്കിയുള്ള 500 ഓളം പേരെ സപ്ലിമെന്ററി ലിസ്റ്റിലേക്ക് തള്ളിക്കയറ്റി.
റിപ്പോർട്ട് ചെയ്യാത്തതും പ്രശ്നം
ഒഴിവുകൾ ഡി.ഡി.ഇ ഓഫീസിൽ നിന്നും പി.എസ്.സിക്ക് റിപ്പോർട്ട് ചെയ്യാത്തതും നിയമനം വൈകിക്കുന്നുവന്നാണ് റാങ്ക് ഹോൾഡോഴ്സ് അസോസിയേഷൻ പറയുന്നത്. കൊവിഡ് പ്രശ്നം കാരണം സ്കൂളുകൾ തുറക്കാത്തതിനാലാണ് നിയമനം വൈകുന്നതെന്നാണ് അധികൃതർ പറയുന്നത്. എന്നാൽ നിയമനം പരമാവധി വൈകിപ്പിക്കാൻ നടക്കുന്ന ചില കളികളാണ് തടസമെന്ന് ഉദ്യോഗാർത്ഥികൾ ആരോപിക്കുന്നു.
ഒഴിവുകൾ(വിദ്യാഭ്യാസവകുപ്പിന്റെ ഔദ്യോഗിക സൈറ്റിൽ)
കാസർകോട് 213
മലപ്പുറം 779
പാലക്കാട് 130
കേസുകളിൽ കുരുക്കി നിയമനം മനഃപൂർവ്വം വൈകിപ്പിക്കാനാണ് വിദ്യാഭ്യാസ വകുപ്പും പി.എസ്.സിയും ശ്രമിക്കുന്നത്
(ഉദ്യോഗാർത്ഥികൾ ,റാങ്ക് ഹോൾഡേഴ്സ് അസോസിയേഷൻ )