പഴയങ്ങാടി: വർണ്ണങ്ങളുടെ ലോകത്ത് ചിത്രരചനയിലൂടെ അത്ഭുതം തീർക്കുകയാണ് അടുത്തില ചെവിടിച്ചാലിലെ അനുറിയ. മ്യൂറൽ പെയിന്റിംഗിലൂടെയാണ് നൂറുകണക്കിന് ചിത്രങ്ങൾ ഈ കൊച്ചുമിടുക്കി വരച്ച് തീർത്തത്. മഹാവിഷ്ണു, അനന്തനാഗം, ലക്ഷ്മിദേവി, ഭൂമിദേവി, നാരദമഹർഷി, നന്ദികേശൻ, ശൂകമഹർഷി, മുനിവര്യന്മാർ, ബ്രഹ്മാവ്, സനകാദി മഹർഷിമാർ, ഇന്ദ്രൻ, ദേവഗണങ്ങൾ, ഗരുഡൻ, സൂര്യൻ, ചന്ദ്രൻ, ശിവലിംഗം, കൂർമ്മം, മത്സ്യം, ശംഖ്, അരയന്നങ്ങൾ എന്നിങ്ങനെ 25 കഥാപാത്രങ്ങളിലൂടെ 31 ചിത്രങ്ങളുടെ സങ്കലനമാണ് അനുറിയ തന്റെ കാൻവാസിലേക്ക് ആവാഹിച്ചെടുത്തത്.

രണ്ടര മീറ്റർ നീളവും ഒന്നര മീറ്റർ വീതിയുമുള്ള കാൻവാസുകളിലാണ് ചിത്രങ്ങൾ. മാടായി ഗവ. ഗേൾസ് ഹയർ സെക്കൻഡറി സ്‌കൂളിലെ ഇംഗ്ലീഷ് മീഡിയം വിഭാഗത്തിൽ പത്താം തരം വിദ്യാർത്ഥിനിയായ അനുറിയ ഓൺലൈൻ പഠനത്തിനിടെയാണ് മ്യൂറൽ പെയിന്റിംഗ് രചന ചെയ്യുന്നത്. മാടായികാവ്, ക്ഷേത്ര കലാ അക്കാഡമിയിലെ ചിത്രകലാ അദ്ധ്യാപകനായ ശ്രീകുമാറിന്റെ കീഴിലാണ് മ്യൂറൽ പെയിന്റിംഗ് പഠിക്കുന്നത്.

ലോക്ക്‌ഡൗൺ നിയന്ത്രണം കാരണം അക്കാഡമിയിൽ പഠനം നടക്കാത്തതിനാൽ ഫോൺ വഴിയുള്ള നിർദേശത്തിലാണ് അനന്തശയനം ചിത്രം പൂർത്തിയാക്കിയത്. ഗീതോപദേശം, ശ്രീഗണേശൻ, അർദ്ദനാരീശ്വരൻ, നടരാജ പ്രദോഷ നൃത്തം, മാതാവും ഉണ്ണീയശോയും, കൃഷ്ണനും രാധയും തുടങ്ങി നിരവധി മ്യൂറൽ ചിത്രങ്ങളും, ഗ്ലാസ് പെയിന്റിംഗുകളും അനുറിയുടെ ചിത്ര ശേഖരത്തിലുണ്ട്, നെരുവമ്പ്രം യു.പി.സ്‌കൂളിലെ ആറാംതരം വിദ്യാർത്ഥിയായ അനുജൻ അബിജോയലാണ് അനുറിയെ ചിത്രരചനയിൽ സഹായിക്കുന്നത്, കണ്ണൂർ ഡിവൈ.എസ്.പി ഓഫിസിലെ സിവിൽ പൊലിസ് ഓഫീസർ അജീഷിന്റെയും സുനിതയുടെയും മകളാണ് അനുറിയ.