കണ്ണൂർ: ജില്ലയിലെ 25 സ്‌കൂളുകൾക്കായി മോഡുലാർ ടോയ്ലെറ്റ് സംവിധാനമൊരുക്കി ജില്ലാ പഞ്ചായത്ത്. ശൗചാലയങ്ങൾ ഇല്ലാതിരുന്ന 25 സ്‌കൂളുകളിലാണ് ജില്ലാ പഞ്ചായത്തിന്റെ നേതൃത്വത്തിൽ മോഡുലാർ ടോയ്ലെറ്റുകൾ സ്ഥാപിച്ചത്. ഒരു സ്‌കൂളിന് അഞ്ചെണ്ണം വീതം 125 ടോയ്ലെറ്റുകളാണ് ഒരുക്കിയിരിക്കുന്നത്.
ജില്ലാ പഞ്ചായത്തിന്റെ നേതൃത്വത്തിലുള്ള വിദഗ്ധ സമിതി ജില്ലയിലെ സ്‌കൂളുകളിൽ നടത്തിയ പരിശോധനയിൽ പല സ്‌കൂളുകളിലെയും ശൗചാലയങ്ങളുടെ ശോച്യാവസ്ഥ ബോധ്യമായിരുന്നു. മൂന്നുകോടി രൂപ ചെലവിലാണ് പ്രീ ഫാബ് സ്റ്റീൽ മോഡുലാർ ടോയ്ലെറ്റ്‌ ബ്ലോക്ക് സ്ഥാപിച്ചിരിക്കുന്നത്. എളുപ്പത്തിൽ സ്ഥാപിക്കാൻ കഴിയുന്ന പോർട്ടബിൾ ടോയ്ലെറ്റുകളാണ് ഇവ. പരിമിതമായ സ്ഥലം മാത്രമാണ് ഇതിന് ആവശ്യം. പദ്ധതിയുടെ ആദ്യഘട്ടത്തിൽ ജില്ലാ പഞ്ചായത്തിനു കീഴിലുള്ള 73 ഗവ. സ്‌കൂളുകൾക്ക് ശുചീകരണ ഉപകരണങ്ങൾ വിതരണം ചെയ്തിരുന്നു.

പദ്ധതി ഉദ്ഘാടനം പാപ്പിനിശേരിയിൽ

പദ്ധതിയുടെ ഉദ്ഘാടനം പാപ്പിനിശ്ശേരി ഇ.എം.എസ് സ്മാരക ഗവ. ഹൈസ്‌കൂളിൽ ജില്ലാ പഞ്ചായത്ത് പ്രസിഡന്റ് കെ.വി സുമേഷ് നിർവ്വഹിച്ചു. ചടങ്ങിൽ പാപ്പിനിശ്ശേരി ഗ്രാമപഞ്ചായത്ത് പ്രസിഡന്റ് കെ. നാരായണൻ അദ്ധ്യക്ഷത വഹിച്ചു. ജില്ലാ പഞ്ചായത്ത് വിദ്യാഭ്യാസ സ്ഥിരംസമിതി അദ്ധ്യക്ഷൻ കെ.പി. ജയപാലൻ, ജില്ലാ പഞ്ചായത്തംഗങ്ങളായ പി.പി ഷാജിർ, അജിത്ത് മാട്ടൂൽ, ബ്ലോക്ക് പഞ്ചായത്ത് സ്ഥിരം സമിതി അദ്ധ്യക്ഷൻ പി.വി. മോഹനൻ, ബ്ലോക്ക് പഞ്ചായത്ത് അംഗം കെ.പി ലീല, പഞ്ചായത്തംഗം ടി.കെ പ്രമോദ്, ജില്ലാ പഞ്ചായത്ത് സെക്രട്ടറി വി. ചന്ദ്രൻ, എസ്.എസ്‌.കെ ജില്ലാ കോ-ഓർഡിനേറ്റർ കെ. വേണുഗോപാൽ, പാപ്പിനിശ്ശേരി ഇ.എം.എസ് സ്മാരക ഗവ. ഹൈസ്‌കൂൾ പ്രിൻസിപ്പൽ ടി.പി. സക്കറിയ, പ്രധാന അദ്ധ്യാപകൻ സി. അനൂപ് കുമാർ, പി.ടി.എ പ്രസിഡന്റ് ഇ. അനൂപ്കുമാർ എന്നിവർ പങ്കെടുത്തു.

വൃത്തിഹീനമായ ടോയ്ലെറ്റുകളുള്ള നിരവധി സ്‌കൂളുകളാണ് പരിശോധനയിൽ കണ്ടെത്തിയത്. ഈ സാഹചര്യത്തിലാണ് ജില്ലാ പഞ്ചായത്ത് സ്‌കൂളുകളിലെ ശുചിത്വ ക്യാമ്പയിൻ പദ്ധതിക്ക് തുടക്കം കുറിച്ചത്

കെ.വി. സുമേഷ് പ്രസിഡന്റ്, ജില്ലാ പഞ്ചായത്ത്