പൂഞ്ഞാർ: 'പൂഞ്ഞാർ തൊഴിൽവീഥി" രൂപീകരിക്കാനുള്ള പ്രവർത്തനങ്ങളുമായി പി.സി. ജോർജ് എം.എൽ.എ. കർഷകർക്ക് തങ്ങളുടെ ഉത്പന്നങ്ങൾ വിൽക്കുന്നതിനും വാങ്ങുന്നതിനുമായി രൂപീകരിച്ച 'പൂഞ്ഞാർ കാർഷികവിപണി" വിജയത്തിലെത്തിയതിന്റെ പ്രചോദനത്തിലാണ് തൊഴിൽ അന്വേഷകർക്കും തൊഴിൽദാതാക്കൾക്കും കണ്ടുമുട്ടാൻ ഒരു പ്ലാറ്റ്‌ഫോമായി പൂഞ്ഞാർ തൊഴിൽവീഥി രൂപീകരിക്കുന്നത്. കൊവിഡിനെത്തുടർന്ന് ജോലി നഷ്ടപ്പെട്ടവർക്കും കൃഷി ചെയ്യാൻ ഭൂമിയില്ലാത്തവരുമായ ആളുകൾക്കും ഇത് സഹായമാകുമെന്നാണ് പ്രതീക്ഷ.
ഫേസ്ബുക്ക്, വാട്ട്‌സ്ആപ്പ് എന്നിവയുടെ സാദ്ധ്യതകളെ പരമാവധി പ്രയോജനപ്പെടുത്തി നൈപുണ്യ ജോലിക്കാരെയും, കാർഷിക/കാർഷികേതര ജോലിക്കാരെയും മാത്രമല്ല, പ്രൊഫഷണൽ ജോലിക്കാരെ വരെ കിട്ടുന്ന ഒരു ഡേറ്റാ ബാങ്ക്, ഒഴിവുകൾ പോസ്റ്റ് ചെയ്യാൻ ഒരു ഫേസ്ബുക്ക് ഗ്രൂപ്പ് എന്നിവയാണ് തൊഴിൽവീഥിയിലൂടെ ലക്ഷ്യമിടുന്നത്. സോഷ്യൽ മീഡിയ ഉപയോഗിക്കാത്ത ആളുകളെ ഫോൺവഴി ബന്ധപ്പെടാനുള്ള സൗകര്യവും ഒരുക്കും. ഇതിന് ആവശ്യമായ ആശയങ്ങളും നിർദേശങ്ങളും പൊതുജനങ്ങളിൽനിന്നു സ്വീകരിക്കുമെന്ന് ജോർജ് പറഞ്ഞു.