കോട്ടയം : ജില്ലാ പഞ്ചായത്തിന്റെ കീഴിലുളള ഗവൺമെന്റ്, എയ്ഡഡ് ഹൈസ്‌കൂൾ, ഹയർസെക്കൻഡറി സ്‌കൂളുകളിലെ എസ്.എസ്.എൽ.സി, പ്ളസ് ടു വിദ്യാർത്ഥികൾക്ക് ജില്ലാ പഞ്ചായത്ത് ലാപ്ടോപ്പ് നൽകും. ബി.പി.എൽ വിഭാഗത്തിൽപ്പെട്ടവർക്കായിരിക്കും അർഹത. എസ്.സി, എസ്.ടി, ഒ.ഇ.സി, ഒ.ബി.സി വിഭാഗങ്ങളിൽപ്പെട്ട കുട്ടികൾക്ക് മുൻഗണന ഉണ്ടാകും.ജനറൽ വിഭാഗത്തെയും പരിഗണിക്കും. ഒരു ഡിവിഷനിൽ 20 വീതം ലാപ് ടോപ്പാണ് നൽകുക. ജില്ലാപഞ്ചായത്തിന്റെ 22 ഡിവിഷനുകളിലായി 440 ലാപ്ടോപ്പുകളാണ് വിതരണം ചെയ്യുക. 1 കോടി രൂപയാണ് പദ്ധതിയ്ക്കായി അനുവദിച്ചിട്ടുള്ളത്. ഓൺലൈൻ വിദ്യാഭ്യാസത്തിന് സ്വന്തമായി സ്മാർട്ട് ഫോൺ ഇല്ലാത്തതിനാൽ ജീവൻവെടിഞ്ഞ ദേവിക എന്ന വിദ്യാർത്ഥിനിയുടെ സ്മരണയ്ക്കായി 'ദേവിക സാന്ത്വനം' എന്ന പേരിലാണ് പദ്ധതി.

ലാപ് ടോപ്പിനുള്ള അപേഷ 20നുള്ളിൽ അതത് സ്‌കൂൾ അധികൃതർക്ക് നൽകണം. ഈ പദ്ധതിയുടെ ഗുണഭോക്താക്കളെ സ്‌കൂൾ അധികൃതർ വിദ്യാഭ്യാസ വകുപ്പിന്റെ മേൽനോട്ടത്തിലാണ് തിരഞ്ഞെടുക്കുക. ജില്ലാ പഞ്ചായത്ത് മെമ്പർ, ജില്ലാ വിദ്യാഭ്യാസ ഓഫീസർ, പ്രിൻസിപ്പൽമാരുടെ പ്രതിനിധി, ഹെഡ്മാസ്റ്ററുടെ പ്രതിനിധി എന്നിവരടങ്ങിയ സമിതി മേൽനോട്ടം വഹിക്കും.