അടിമാലി: കുറച്ചു തീ തീപ്പെട്ടി കമ്പുകൾ കൊണ്ട് ദിനോസറിന്റെ ഫോസിൽ. അടിമാലി പള്ളിപ്പറമ്പിൽ ഷിബിൻ കാനായിക്ക് സോഷ്യൽ മീഡിയായിൽ തീപ്പെട്ടികമ്പുകൾ കൊണ്ട് ആരോ നിർമ്മിച്ച ഒരു ചാരുകസേരയുടെ ചിത്രം കണ്ണിൽ ഉടക്കിയതോടെയാണ് എന്തുകൊണ്ട് തനിക്കും ചെയ്ത് കൂടായെന്ന ചിന്ത മനസിലുദിച്ചത്. വിവിധ ജീവികളുടെയും ഗൃഹോപകരണങ്ങളുടെയുമെല്ലാം രൂപങ്ങൾ അതിശയിപ്പിക്കും വിധമാണ് ഷിബിൻ നിർമ്മിച്ചിട്ടുള്ളത്. ചെയ്തു പോന്നിരുന്ന ആശാരിപ്പണിയുടെ കൈവഴക്കം കൂടി ചേർന്നതോടെ രൂപങ്ങൾ ഒന്നൊന്നായി ഷെൽഫിൽ നിറഞ്ഞു. സൈക്കിൾ,ഹൗസ് ബോട്ട്, തേൾ, ഫാൻ, പാമ്പിനെ കൊത്തിയെടുത്ത് പറക്കുന്ന പരുന്ത്, ദിനോസറിന്റെ അസ്ഥികൂടം തുടങ്ങി നിരവധി രൂപങ്ങൾ ഇതിൽപ്പെടും. തീപ്പെട്ടി കമ്പുകൾക്കു പുറമെ ബോട്ടിൽ ആർട്ടിലും എം സീലുപയോഗിച്ചുമെല്ലാം ഷിബിൻ പരീക്ഷണം നടത്തുന്നുണ്ട്. ആറ് വർഷത്തോളമായി തടിപ്പണി ചെയ്യുന്ന ഷിബിൻ ഒഴിവു വേളകളിലാണ് രൂപങ്ങൾ നിർമ്മിക്കുന്നത്. ആവശ്യക്കാർക്ക് ചിത്രങ്ങളും വരച്ച് നൽകുന്നു.തീപ്പെട്ടികമ്പുകളിൽ കൂറേക്കൂടി രൂപങ്ങൾ തീർത്ത് ഒരു പ്രദർശനമൊരുക്കണമെന്നാണ് ഷിബിന്റെ ആഗ്രഹം.