വൈക്കം : പ്രളയക്കെടുതികൾ മൂലം ദുരിതമനുഭവിക്കുന്ന പാവപ്പെട്ട കുടുംബങ്ങൾക്ക് കൈത്താങ്ങായി റെഡ് ക്രോസ് ജില്ലാ കമ്മിറ്റി. ജില്ലയിലെ വിവിധ ഭാഗങ്ങളിലുള്ള നിർദ്ധനർക്ക് 620 ഓളം ശൗചാലയങ്ങളാണ് നിർമ്മിച്ച് നൽകിയത്. കനേഡിയൻ റെഡ്‌ ക്രോസിന്റെ സഹായത്തോടെ ഇൻഡ്യൻ റെഡ് ക്രോസ് സൊസൈ​റ്റി കേരളത്തിൽ നടപ്പിലാക്കിവരുന്ന വിവിധപദ്ധതികളിലൊന്നാണ് ടോയ്ലെ​റ്റ് നിർമ്മാണം. പദ്ധതിയുടെ വൈക്കം താലൂക്ക് തല ഉദ്ഘാടനം ഗുണഭോക്താക്കൾക്ക് താക്കോൽ നൽകി സി.കെ ആശ എം.എൽ.എ നിർവഹിച്ചു. ഇതോടൊപ്പം സാനി​റ്റേഷൻ സാമഗ്രികളടങ്ങിയ കി​റ്റുകളും വിതരണം ചെയ്തു. റെഡ് ക്രോസ് സൊസൈ​റ്റി താലൂക്ക് ചെയർമാൻ പി.സോമൻ പിള്ള അദ്ധ്യക്ഷത വഹിച്ചു. സംസ്ഥാന വൈസ് ചെയർമാൻ ജോബി തോമസ്, പ്രോജക്ട് മാനേജർ സാബുകുര്യൻ, പ്രോജക്ട് എൻജിനിയർ ബാലുമോഹൻ, താലൂക്ക് സെക്രട്ടറി ബിനു. കെ പവിത്രൻ, വൈസ് ചെയർമാൻ സി.ടികുര്യാക്കോസ്, ട്രഷറർ ജി.പൊന്നപ്പൻ എന്നിവർ പ്രസംഗിച്ചു.