പാലാ : ഭിന്നശേഷിക്കാരെ വഴിയാധാരമാക്കാനുള്ള കേന്ദ്ര സർക്കാരിന്റെ നീക്കത്തെ ചെറുക്കാൻ പൊതുസമൂഹത്തിന്റെ പിന്തുണയുണ്ടാകുമെന്ന് മാണി സി കാപ്പൻ എം.എൽ.എ പറഞ്ഞു. പാലാ ഹെഡ് പോസ്റ്റ് ഓഫീസ് പടിക്കൽ ഭിന്നശേഷിക്കാരുടെ മാതാപിതാക്കൾ നടത്തിയ പ്രതിഷേധ സമരം ഉദ്ഘാടനം ചെയ്യുകയായിരുന്നു അദ്ദേഹം. വിഷയം നിയമസഭയിൽ ഉന്നയിക്കും. കാരുണ്യമർഹിക്കുന്ന ഭിന്നശേഷിക്കാരെ ചേർത്ത് നിറുത്തുന്നതിന് പകരം അവരെ തള്ളി പറയുന്ന നിലപാട് മനുഷ്യത്വരഹിതമാണ്. ഭിന്നശേഷിക്കാരും സമൂഹത്തിന്റെ ഭാഗമാണ്. ആക്ട് പിൻവലിക്കാനുള്ള കേന്ദ്ര സർക്കാരിന്റെ നീക്കം മനുഷ്യാവകാശ ലംഘനമാണെന്നും എം.എൽ.എ പറഞ്ഞു. പ്രധാനമന്ത്രിക്ക് അയയ്ക്കുന്ന കത്തയയ്ക്കൽ പരിപാടിയുടെ ഉദ്ഘാടനവും അദ്ദേഹം നിർവഹിച്ചു. എബി ജെ ജോസ്, സാബു എബ്രാഹം, സിസ്റ്റർ റോസ്മിത, സിസ്റ്റർ എൽസിറ്റ്, സിസ്റ്റർ ലില്ലീസ്, മാത്യുക്കുട്ടി, ലിജു, മരഗതം, വിലാസിനി, പതജ്ഞ, ബിജു, പ്രസന്ന എന്നിവർ പങ്കെടുത്തു.