ടോക്കിയോ: ഒമ്പത് പേരെ കൊന്ന് കഷ്ണങ്ങളാക്കി ഫ്രീസറിൽ സൂക്ഷിച്ചതായി കുറ്റസമ്മതം നടത്തി ജപ്പാനിലെ 'ട്വിറ്റർ കില്ലർ" തകാഹിരോ ഷിറൈഷി.

കഷണങ്ങളാക്കിയ ഒമ്പത്​ മൃതദേഹങ്ങളും 240ലേറെ എല്ലിൻ കഷണങ്ങളും പെട്ടികളിലാക്കി സൂക്ഷിച്ചിരുന്നത് 29കാരനായ ഷിറൈഷിയുടെ വീട്ടിൽ നിന്ന്​ പൊലീസ്​ കണ്ടെടുത്തു.

ഇയാൾക്കെതിരെ ബലാത്സംഗ കുറ്റവും നിലവിലുണ്ട്. ആത്മഹത്യ ചെയ്യുന്നതായി ട്വീറ്റ്​ ചെയ്​ത 15നും 26നും മദ്ധ്യേ പ്രായമുള്ളവരുമായി ട്വിറ്ററിലൂടെ ബന്ധ​പ്പെടുകയും ജീവനൊടുക്കാൻ താൻ സഹായിക്കാമെന്നും അല്ലെങ്കിൽ അവർക്കൊപ്പം മരിക്കാമെന്നും വാഗ്​ദാനം ചെയ്ത ശേഷം അവരെ കൊല​പ്പെടുത്തുകയായിരുന്നു ഷിറൈഷിയുടെ രീതി. ട്വി​റ്റ​റി​ലൂ​ടെ ഇ​ര​ക​ളെ ക​ണ്ടെ​ത്തി കൊ​ല​പ്പെ​ടു​ത്തു​ന്ന​തി​നാ​ലാ​ണ്​ 'ട്വിറ്റർ കില്ലർ' എന്ന പേരു വന്നത്​.

ഒരു ജാപ്പനീസ്​ മാദ്ധ്യമത്തിന്​ നൽകിയ അഭിമുഖത്തിൽ ഇരകളുടെ സമ്മതത്തോടെയല്ല കൊന്നതെന്ന്​ ഷിറൈഷി പറഞ്ഞിരുന്നു.

തനിക്ക്​ സ്വയം ജീവനൊടുക്കണമെന്ന്​ തുടർച്ചയായി ട്വീറ്റ്​ ചെയ്​ത 23കാരിയെ കാണാതായതിനെ തുടർന്ന് സഹോദരൻ യുവതിയുടെ ട്വിറ്റർ അക്കൗണ്ട്​ പരിശോധിച്ചപ്പോൾ സംശയാസ്​പദമായ ട്വിറ്റർ ഹാൻഡിൽ ശ്രദ്ധയിൽ പ്പെടുകയായിരുന്നു. തുടർന്ന്​​ നടത്തിയ അന്വേഷണത്തിനൊടുവിലാണ്​ മൂന്ന്​ വർഷം മുമ്പ്​ ഷിറൈഷി പൊലീസിന്റെ പിടിയിലാവുന്നത്​.

എന്നാൽ ഷിറൈഷിയെ വധശിക്ഷയ്ക്ക്​ വിധിക്കരുതെന്നും സ്വയം ജീവനൊടുക്കാൻ തീരുമാനിച്ചവരെ അവരുടെ സമ്മതത്തോടെയാണ്​​ കൊലപ്പെടുത്തിയതെന്നും അയാളുടെ അഭിഭാഷകൻ കോടതിയിൽ വാദിച്ചു.