കൊച്ചി: പാലാരിവട്ടത്തെ മേൽപ്പാലം പൊളിക്കുന്ന ജോലികൾ വിലയിരുത്തുന്നതിനുവേണ്ടി പൊതുമരാമത്ത് മന്ത്രി ജി സുധാകരൻ ഇന്ന് സ്ഥലം സന്ദർശിക്കും. രാവിലെ പത്തരയോടെയാവും അദ്ദേഹം എത്തുക എന്നാണ് റിപ്പോർട്ട്. പാലം പണിയുടെ മേൽനോട്ടം വഹിക്കുന്ന ഡി എം ആർ സി, ഊരാളുങ്കൽ സൊസൈറ്റി എന്നിവയിലെ ഉദ്യോഗസ്ഥരും മന്ത്രിക്കൊപ്പമുണ്ടാകും.

കഴിഞ്ഞ തിങ്കളാഴ്ചയാണ് പാലം പൊളിക്കുന്നതിന് തുടക്കമിട്ടത്. രണ്ട് മാസത്തിനുളളിൽ പൊളിക്കൽജോലികൾ പൂർത്തിയാവും. എട്ടുമാസത്തിനുളളിൽ നിർമ്മാണം പൂർത്തിയാക്കാനാണ് ധാരണ. പാലത്തിലെ കോൺക്രീറ്റ് ഡിവൈഡർ പൊളിക്കുന്ന ജോലിയാണ് ഇപ്പോൾ നടക്കുന്നത്.ഇത് അന്തിമഘട്ടത്തിലാണ്. ഇന്നുമുതൽ കൂടുതൽ ഉപകരണങ്ങൾ എത്തിച്ച് ജോലികൾ വേഗത്തിലാക്കും.