ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം മൂന്ന് കോടി അമ്പത് ലക്ഷം കടന്നു. ഇതുവരെ 35,121,850 പേർക്കാണ് വൈറസ് ബാധ സ്ഥിരീകരിച്ചത്. മരണസംഖ്യ 1,037,520 ആയി ഉയർന്നു.26,116,755 പേർ രോഗമുക്തി നേടി.

ഏറ്റവും കൂടുതൽ പേർ ചികിത്സയിൽ കഴിയുന്ന അമേരിക്കയിൽ എഴുപത്തിയാറ് ലക്ഷത്തിലധികം പേർക്കാണ് ഇതുവരെ രോഗം സ്ഥിരീകരിച്ചത്. ആകെ രോഗബാധിതരുടെ എണ്ണം 7,600,846 ആയി. മരണസംഖ്യയും കുതിച്ചുയരുകയാണ്. 214,277 പേരാണ് യു.എസിൽ വൈറസ് ബാധമൂലം മരണമടഞ്ഞത്. സുഖം പ്രാപിച്ചവരുടെ എണ്ണം 4,818,509 ആയി.

രോഗബാധിതരുടെ എണ്ണത്തിൽ രണ്ടാം സ്ഥാനത്തുള്ള ഇന്ത്യയിൽ ഇതുവരെ 65 ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. വൈറസ് ബാധമൂലമുള്ള മരണം ഒരുലക്ഷം പിന്നിട്ടു. ആഗോളതലത്തിൽ മരണനിരക്ക് 2.97 ശതമാനമായിരിക്കെ ഇന്ത്യയിലിത് 1.56 ശതമാനമാണ്. രോഗമുക്തരുടെ എണ്ണത്തിൽ ലോകത്ത് ഒന്നാമതാണ് ഇന്ത്യ. 54 ലക്ഷത്തിലധികം പേർ ഇതുവരെ സുഖംപ്രാപിച്ചു.

രോഗബാധിതരുടെ എണ്ണത്തിൽ ബ്രസീലാണ് മൂന്നാം സ്ഥാനത്ത്. രാജ്യത്ത് കൊവിഡ് ബാധിതരുടെ എണ്ണം അമ്പത് ലക്ഷത്തോടടുക്കുന്നു. ഇതുവരെ 4,906,833 പേർക്കാണ് രോഗം സ്ഥിരീകരിച്ചത്. മരണസംഖ്യ 146,011 ആയി.4,248,574 പേർ രോഗമുക്തി നേടി.