കൊച്ചി: പ്രമുഖ ജർമ്മൻ ആഡംബര കാർ നിർമ്മാതാക്കളായ ഔഡിയുടെ എൻട്രി-ലെവൽ എസ്.യു.വിയായ ക്യൂ2 ഇന്ത്യയിലും വിപണി വാഴാനെത്തുന്നു. ഈ മാസം അവസാനത്തോടെ വില്പനയ്ക്കെത്തുന്ന ഈ 'അഫോർഡബിൾ" ലക്ഷ്വറി കാറിന്റെ ബുക്കിംഗ് ഡീലർഷിപ്പുകളിലും www.audi.in/in വെബ്‌സൈറ്റിലും തുടങ്ങി. രണ്ടുലക്ഷം രൂപയടച്ച് ബുക്ക് ചെയ്യാം.

2+3 വർഷ എക്‌സ്‌റ്റൻഡഡ് വാറന്റിയും 2+3 വർഷ റോഡ് സൈഡ് അസിസ്‌റ്റൻസും അഞ്ചുവർഷ സർവീസ് പാക്കേജും ക്യൂ2ന് ഔഡി വാഗ്‌ദാനം ചെയ്യുന്നുണ്ട്. ഈവർഷം ഔഡി വിപണിയിലെത്തിക്കുന്ന അഞ്ചാമത്തെ മോഡലാണ് ക്യൂ2. ക്യൂ8, എ8, ആർ.എസ്7, ആർ.എസ് ക്യൂ8 എന്നിവയാണ് നേരത്തേ അവതരിപ്പിച്ചത്.

ഉന്നം പുതുമുഖങ്ങൾ

ആഡംബര കാറുകളുടെ ലോകത്തേക്ക് ആദ്യമായി ചുവടുവയ്ക്കുന്നവരെയാണ് ഔഡി ക്യൂ2 ഉന്നമിടുന്നത്. കുടുംബത്തിലേക്ക് അധികമായി ഒരു ആഡംബര കാർ വേണമെന്ന് കരുതുന്ന നിലവിലെ ഉപഭോക്താക്കളും ഔഡിയുടെ കണ്ണിലുണ്ട്.

ക്വാട്രോ എൻജിൻ

ഔഡിയുടെ സ്വന്തം 'ക്വാട്രോ" സാങ്കേതികവിദ്യയുള്ള 2-ലിറ്റർ ടി.എഫ്.എസ്.ഐ പെട്രോൾ എൻജിനാണ് ക്യൂ2നുള്ളത്. പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ ഇതിന് 6.5 സെക്കൻഡ് മതി.

₹35 ലക്ഷം

ഔഡി ക്യൂ2ന്റെ വില കമ്പനി വെളിപ്പെടുത്തിയിട്ടില്ല. എങ്കിലും 30-35 ലക്ഷം രൂപ പ്രതീക്ഷിക്കാം.