റോൾസ് റോയിസ് എന്ന പേര് കേൾക്കുമ്പോൾ നമ്മുടെ മനസിലേക്ക് ആദ്യം ഓടിയെത്തുക ആഡംബര കാറുകളാണ്. എന്നാൽ ഇവർ കാർ നിർമാതാക്കൾ മാത്രമല്ല. ലോകത്തിലെ ഏറ്റവും വേഗതയേറിയ ഇലക്ട്രിക് വിമാനങ്ങൾ നിർമിക്കുക എന്ന ദൗത്യത്തിലാണ് അവരിപ്പോൾ.

ലോകത്തിലെ ഏറ്റവും വേഗതയേറിയ ഇലക്ട്രിക് വിമാനത്തിന് ശക്തി പകരുന്ന സാങ്കേതികവിദ്യയുടെ പരിശോധന റോൾസ് റോയ്സ് പൂർത്തിയാക്കി.ഈ വിമാനം റോൾസ്‌ റോയ്സിന്റെ ACCEL (Accelerating the Eletcrification of Flight) പദ്ധതിയുടെ ഭാഗമാണ്.

വെള്ള നിറമുള്ള റോൾസ്-റോയ്‌സ് വിമാനത്തിന്റെ അടിഭാഗത്തിന് നീല നിറമാണ് നൽകിയിരിക്കുന്നത്. പ്രൊപ്പല്ലർ നോസിന് പിന്നിലായാണ് ഇലക്ട്രിക് മോട്ടോർ ഘടിപ്പിച്ചിരിക്കുന്നത്. മൂന്ന് ഉയർന്ന പവർ ഡെൻസിറ്റി ആക്സിയൽ ഇലക്ട്രിക് മോട്ടോറുകളാണ് പ്രൊപ്പല്ലറിനെ കറക്കുന്നത്. മൂന്ന് ഇലക്ട്രിക് മോട്ടോറുകളും ചേർന്ന് 500 എച്ച്പിയിലധികം പവർ നിർമിക്കും

'യു.കെ ഗവൺമെന്റിന്റെ കൊവിഡ് മാനദണ്ഡങ്ങൾ പാലിച്ചുകൊണ്ട് ടീം സാങ്കേതികവിദ്യ വികസിപ്പിച്ചുകൊണ്ടിരിക്കുകയാണ്. ഈ സംവിധാനങ്ങൾ ഉടൻ തന്നെ ഞങ്ങളുടെ 'സ്പിരിറ്റ് ഒഫ് ഇന്നൊവേഷൻ' വിമാനത്തിൽ സംയോജിപ്പിക്കും. ഞങ്ങൾ ടെസ്റ്റ് എയർഫ്രെയിമിന് 'അയൺബേർഡ്' എന്ന് പേരിട്ടു'- അധികൃതർ പറയുന്നു.

'ACCEL പ്രോജക്ടിനായി ഗ്രൗണ്ട് ടെസ്റ്റിംഗ് പൂർത്തിയാക്കുന്നത് ടീമിനെ സംബന്ധിച്ച് വലിയ നേട്ടമാണ്. ലോക റെക്കോർഡ് ശ്രമത്തിലേക്കുള്ള മറ്റൊരു സുപ്രധാന ഘട്ടമാണെന്ന് റോൾസ് റോയ്സ് ഇലക്ട്രിക്കൽ ഡയറക്ടർ റോബ് വാട്സൺ പറഞ്ഞു.

പരിസ്ഥിതി സൗഹാർദ വിമാനമാണ് തങ്ങളുടേത് എന്ന് റോൾസ് റോയ്‌സ് വ്യക്തമാക്കുന്നു. ഇതുവരെ നിർമിച്ചതിൽ വച്ച് ഏറ്റവും സാന്ദ്രമായ ബാറ്ററി പായ്ക്കാണ് തങ്ങളുടെ ഇലക്ട്രിക്ക് വിമാനത്തിന് എന്ന് റോൾസ് റോയ്‌സ് അവകാശപ്പെടുന്നു.