മുംബയ്: രാജ്യത്തെ റീജിയണൽ റൂറൽ ബാങ്കുകളുടെ സ്ഥിതി ആശാവഹമല്ലെന്ന് നബാർഡിന്റെ റിപ്പോർട്ട്. കഴിഞ്ഞ സാമ്പത്തിക വർഷം (2019-20)​ ഇവയുടെ സംയുക്ത നഷ്‌ടം 2,​206 കോടി രൂപയായി കുത്തനെ വർദ്ധിച്ചു. 2018-19ൽ നഷ്‌ടം 652 കോടി രൂപയായിരുന്നു.

26 ബാങ്കുകൾ ചേർന്ന് കഴിഞ്ഞവർഷം 2,​203 കോടി രൂപയുടെ ലാഭം നേടിയിരുന്നു. എന്നാൽ,​ 19 ബാങ്കുകൾ 4,​409 കോടി രൂപയുടെ നഷ്‌ടം നേരിട്ടു. ഇതോടെയാണ് സംയുക്ത നഷ്‌ടം 2,​206 കോടി രൂപയായത്. കഴിഞ്ഞ മാർച്ച് 31ലെ കണക്കനുസരിച്ച് 45 റീജിയണൽ റൂറൽ ബാങ്കുകളാണ് രാജ്യത്തുള്ളത്. 26 സംസ്ഥാനങ്ങളിലും കേന്ദ്രഭരണ പ്രദേശങ്ങളിലുമായുള്ള 685 ജില്ലകളിലായി ഇവ പ്രവർത്തിക്കുന്നു.

15 വാണിജ്യ ബാങ്കുകളുടെ നിയന്ത്രണത്തിലാണ് ഇവയുടെ പ്രവർത്തനം. 21,​850 ശാഖകളാണുള്ളത്. നഷ്‌ടം ഉയർന്നെങ്കിലും ഗ്രാമീണ ബാങ്കുകളുടെ മൊത്തം നിഷ്‌ക്രിയ ആസ്‌തി (ജി.എൻ.പി.എ)​ മുൻവർഷത്തെ 10.8 ശതമാനത്തിൽ നിന്ന് 10.4 ശതമാനമായി കുറഞ്ഞെന്ന് നബാർഡ് വ്യക്തമാക്കി. 18 ഗ്രാമീണ ബാങ്കുകളുടെ മൊത്തം നിഷ്‌ക്രിയ ആസ്‌തി 10 ശതമാനത്തിന് മുകളിലാണ്.

കഴിഞ്ഞവർഷം 8.6 ശതമാനം വളർച്ചയോടെ ഈ ബാങ്കുകളുടെ മൊത്തം ബിസിനസ് 7.77 ലക്ഷം കോടി രൂപയായി. നിക്ഷേപങ്ങൾ 10.2 ശതമാനവും വായ്‌പകൾ 9.5 ശതമാനവും വർദ്ധിച്ചു. 2.98 ലക്ഷം കോടി രൂപയാണ് മൊത്തം വായ്‌പ. ഇതിൽ 90.6 ശതമാനവും (2.70 ലക്ഷം കോടി രൂപ)​ മുൻഗണനാ വിഭാഗത്തിലുള്ള വായ്‌പകളാണ്. 70 ശതമാനമാണ് കാർഷിക വായ്‌പയുടെ വിഹിതം. എം.എസ്.എം.ഇ വായ്‌പകൾ 12 ശതമാനം. 10.2 ശതമാനമാണ് ഗ്രാമീണ ബാങ്കുകളുടെ സംയുക്ത മൂലധന പര്യാപ്‌തതാ അനുപാതം.