കേരളത്തിലെ ആദ്യത്തെ ട്രാൻസ്ജെൻഡർ ദമ്പതികളായ സൂര്യയും ഇഷാനും ഏവർക്കും സുപരിചിതരാണ്. റിയാലിറ്റി ഷോയിലൂടെ ശ്രദ്ധ നേടിയ കോമഡി താരം കൂടിയാണ് സൂര്യ. രണ്ട് വർഷം മുമ്പാണ് ഏറെ ആഘോഷത്തോടെ ഇരുവരുടെയും വിവാഹം നടന്നത്. വിവാഹ ശേഷവും ഇരുവരും അഭിമുഖങ്ങളിലും പരിപാടികളിലും വിവിധ ചർച്ചകളിലും പങ്കെടുത്തിരുന്നു. അങ്ങനെയാണ് ഇരുവരും കൂടുതൽ ജനശ്രദ്ധ നേടിയത്. സ്വന്തം ചോരയിൽ ഒരു കുഞ്ഞ് വേണം എന്നതാണ് ഇരുവരുടെയും ഇപ്പോഴത്തെ ആഗ്രഹം. അതിനുള്ള സാധ്യതകൾ അന്വേഷിക്കുകയാണ് രണ്ടുപേരും. രണ്ടാം വിവാഹ വാർഷിക ആഘോഷത്തോടനുബന്ധിച്ച് ഇവർ നടത്തിയ ഫോട്ടോഷൂട്ട് ചിത്രങ്ങളാണ് ഇപ്പോൾ സോഷ്യൽ മീഡിയ ഏറ്റെടുത്തിരിക്കുന്നത്. ആലുവ പുഴയുടെ തീരങ്ങളിൽ വച്ചാണ് മനോഹരമായ ചിത്രങ്ങൾ പകർത്തിയിരിക്കുന്നത്. ഗ്രാമീണതയും ഹരിത ഭംഗിയും നിറഞ്ഞ ചിത്രങ്ങൾ സമൂഹമാദ്ധ്യമങ്ങളിൽ പറപറക്കുകയാണ്.