ഹെൽസിങ്കി: മുതൽവൻ എന്ന തമിഴ് സിനിമയെപ്പറ്റി എല്ലാവർക്കും അറിയാം. മാദ്ധ്യമപ്രവർത്തകനായ നായകന് ഒരു ദിവസത്തേക്ക് തമിഴ്നാട് മുഖ്യമന്ത്രി പദത്തിലിരിക്കാൻ അവസരം ലഭിക്കുന്നതും തുടർന്നുള്ള സംഭവവികാസങ്ങളുമായിരുന്നു സിനിമയുടെ ഇതിവൃത്തം. ഈ സിനിമാക്കഥ ഇപ്പോൾ അങ്ങ് ഫിൻലാൻഡിൽ യാഥാർത്ഥ്യമായിരിക്കുകയാണ്.

ഒരു ദിവസത്തേക്ക്​ രാജ്യത്തിന്റെ പ്രധാനമന്ത്രി പദമലങ്കരിക്കാൻ അവസരം ലഭിച്ചത് 16കാരിയായ ആവാ മുർ​​ട്ടോക്കായിരുന്നു. പ്രധാനമന്ത്രി സന്ന മരിൻ ബുധനാഴ്​ചയാണ് അധികാരം താത്കാലികമായി ആവയ്ക്ക് നൽകിയത്. കുട്ടികളുടെ അവകാശങ്ങൾക്കുവേണ്ടി പ്രവർത്തിക്കുന്ന പ്ലാൻ ഇന്റർനാഷനൽ എന്ന ചാരിറ്റി സംഘടനയുടെ 'ഗേൾസ്​ ടേക്കോവർ' കാമ്പയിന്റെ ഭാഗമായാണ്​ 'ഒരു ദിവസം പ്രധാനമന്ത്രി' പരിപാടി നടത്തിയത്

ആവേശകരമായ ദിവസമായിരുന്നു ഇതെന്ന്​ ആവാ പറയുന്നു. ചാൻസലർ ഒഫ്​ ജസ്​റ്റിസുമായി കൂടിക്കാഴ്​ച നടത്തിയശേഷം പാർലമെന്റിന്റെ പടവുകളിൽ കുട്ടി പ്രധാനമന്ത്രി മാദ്ധ്യമങ്ങളെ അഭിമുഖീകരിച്ചു.

കാലാവസ്ഥ വ്യതിയാനം, മനുഷ്യാവകാശം തുടങ്ങിയ കാര്യങ്ങളുമായി ബന്ധപ്പെട്ട് ആവ പ്രവർ‌ത്തിക്കുന്നുണ്ട്.

ബുധനാഴ്​ച നിരവധി എം.പിമാരുമായും മന്ത്രിമാരുമായും ആവ സംസാരിച്ചു. 'പെൺകുട്ടികൾ എത്ര പ്രധാനപ്പെട്ടവരാണെന്ന്​ തിരിച്ചറിയേണ്ടത്​ ആവശ്യമാണ്​. സാ​ങ്കേതികതയിൽ ആൺകുട്ടിക​ളെപ്പോലെ അവരും മിടുക്കരാ​ണ്​. കൂടുതൽ പരിഷ്​കരണങ്ങൾക്കായി മുതിർന്നവർക്ക്​ മാർഗദർശനം നൽകാനും ഭാവിയെക്കുറിച്ച്​ കൂടുതൽ ചിന്തിക്കാനും യുവജനതക്ക്​ കഴിയുമെന്നാണ്​ ഞാൻ കരുതുന്നത്​' -ആവാ പറഞ്ഞു.