പാരിസ്: നല്ലവനായ ആ അപരിചിതൻ നൽകിയ ലോട്ടറി ടിക്കറ്റ് വഴി ഫ്രാൻസിലെ ഭവനരഹിതരായ നാല് യാചകർക്ക് ലഭിച്ചത് 50000 യൂറോ (ഏകദേശം 43 ലക്ഷം രൂപ).
ലോട്ടറി കടയുടെ മുന്നിൽ ഭിക്ഷ യാചിക്കുകയായിരുന്നു മുപ്പതുകാരായ നാല് പേർ. ഇതിനിടെയാണ് കടയിൽ നിന്ന് ഇറങ്ങിപ്പോയ ഒരാൾ ഒരു യൂറോ കൊടുത്ത് വാങ്ങിയ സ്ക്രാച് കാർഡ് ഇവർക്ക് സമ്മാനിച്ച് സ്ഥലം വിട്ടത്.
'എന്തൊരു ഭാഗ്യമാണ് ആ ചെറുപ്പക്കാർക്ക്. അഞ്ച് യൂറോയല്ല പകരം 50000 യൂറോയാണ് അവർക്ക് സമ്മാനമായി ലഭിച്ചിരിക്കുന്നത്'- ലോട്ടറി ഓപറേറ്റർമാരായ എഫ്.ഡി.ജെ പ്രസ്താവനയിൽ പറഞ്ഞു. സമ്മാനജേതാക്കൾ തുക തുല്യമായി വീതിച്ചെടുക്കാൻ തീരുമാനിച്ചതായും എഫ്.ഡി.ജെ വ്യക്തമാക്കി.
സമ്മാനമായി ലഭിച്ച തുക വച്ച് എന്ത് ചെയ്യണമെന്ന് അവർ തീരുമാനിച്ചില്ലെങ്കിലും എത്രയും പെട്ടന്ന് നഗരം വിടാനാണ് പദ്ധതിയെന്നും ഇവരുടെ വക്താവ് വാർത്ത ഏജൻസിയായ എ.എഫ്.പിയോട് പറഞ്ഞു.