ന്യൂഡൽഹി: പശ്ചിമ ബംഗാൾ മുഖ്യമന്ത്രി മമത ബാനർജിക്കെതിരേ ആഞ്ഞടിച്ച് ബി.ജെ.പി. അധികാരത്തിൽ മമതയുടെ ദിനങ്ങൾ എണ്ണപ്പെട്ടുവെന്ന് ബി.ജെ.പി ദേശീയ അദ്ധ്യക്ഷൻ ജെ.പി. നദ്ദ പറഞ്ഞു. സമാധാനപരമായി പ്രതിഷേധിച്ചവർക്കെതിരെയുള്ള നടപടികൾ മമതയുടെ നിരാശയെയാണ് കാണിക്കുന്നതെന്നും അദ്ദേഹം പറഞ്ഞു.

"സമാധാനപരമായി പ്രതിഷേധിച്ചവരെ മർദ്ദിക്കുക, നാടൻ ബോബ് എറിയുക, പ്രതിഷേധ മാർച്ചിന് നേരെ ജലപീരങ്കി പ്രയോഗിക്കുക എന്നിവ മമതയുടെ നിരാശയാണ് കാണിക്കുന്നത്. കാരണം അധികാരത്തിൽ അവരുടെ ദിനങ്ങൾ എണ്ണപ്പെട്ടുവെന്ന് അവർക്കറിയാം. അവരുടെ സ്വേച്ഛാധിപത്യ സർക്കാരിനെ പുറത്താക്കാൻ ബംഗാളിലെ ജനങ്ങൾ മനസിൽ നിശ്ചയിച്ചിട്ടുണ്ട്, അദ്ദേഹം ട്വിറ്ററിൽ കുറിച്ചു. സംസ്ഥാനത്തെ ക്രമസമാധാനനില തകരാറിലാണെന്ന് ആരോപിച്ച് ഹൗറയിൽ നിന്നും കൊൽക്കത്തയിൽ നിന്നുമുള്ള നൂറുകണക്കിന് ബി.ജെ.പി. പ്രവർത്തകർ പശ്ചിമ ബംഗാൾ സെക്രട്ടേറിയേറ്റിലേക്ക് മാർച്ച് നടത്തിയിരുന്നു. പ്രവർത്തകരെ പിരിച്ചുവിടാൻ പൊലീസ് ലാത്തിച്ചാർജും കണ്ണീർ വാതകവും ജലപീരങ്കിയും പ്രയോഗിച്ചിരുന്നു.