മുംബയ്: ഇന്ത്യൻ യുദ്ധവിമാനങ്ങളുടെ അതീവ രഹസ്യ വിവരങ്ങൾ പാകിസ്ഥാൻ ചാരസംഘടനയായ ഐ എസ് ഐയ്ക്ക് ചോർത്തിനൽകിയ ഹിന്ദുസ്ഥാൻ എയറോനോട്ടിക്സ് ലിമിറ്റഡിലെ ഉദ്യാേഗസ്ഥനെ മഹാരാഷ്ട്ര പൊലീസ് അറസ്റ്റുചെയ്തു. യുദ്ധവിമാനങ്ങളെക്കുറിച്ചും അവയുടെ നിർമാണ യൂണിറ്റിനെയും കുറിച്ചുള്ള വിവരങ്ങളാണ് ഇയാൾ ചോർത്തി നൽകിയെതെന്നാണ് പൊലീസ് പറയുന്നത്.

നാൽപ്പത്തൊന്നുകാരനായ ഇയാൾ ഐ എസ് ഐയുമായി നിരന്തരം ബന്ധപ്പെടുന്നതിനെക്കുറിച്ച് മഹാരാഷ്ട്ര ഭീകര വിരുദ്ധ സ്ക്വാഡിന് വ്യക്തമായ വിവരം ലഭിച്ചിരുന്നു. ഇതിനെത്തുടർന്നായിരുന്നു അറസ്റ്റ്. നാസിക്കിന് സമീപത്തുളള ഓജാറിലെ എച്ച്‌ എ‌ എല്ലിന്റെ വിമാന നിർമാണ യൂണിറ്റ്, ഇവിടത്തെചില നിരോധിത പ്രദേശങ്ങൾ,എയർബേസ്,എന്നിവയുമായി ബന്ധപ്പെട്ട വിവരങ്ങളാണ് ചോർത്തിനൽകിയതെന്നാണ് വിവരം.

മൊബൈൽഫോണുകളും നിരവധി സിംകാർഡുകളും രണ്ട് മെമ്മറി കാർഡുകളും ഇയാളിൽ നിന്ന് പിടിച്ചെടുത്തിട്ടുണ്ട്.ഇവ പരിശോധനയ്ക്ക് അയച്ചിരിക്കുകയാണ്. ഇതിന്റെ ഫലം ഉടൻ ലഭിക്കും. മിഗ് സീരീസ് വിമാനങ്ങളുടെയും സുഖോയ് - 30 എം കെ ഐ വിമാനത്തിന്റെ അറ്റകുറ്റപണികളും നടക്കുന്നത് ഓജാറിലാണ്.