സിംഗപ്പൂർ: ഭർത്താവിനെ ആവശ്യമുണ്ടെന്ന് കാട്ടി ഒരു യുവതി ഇട്ട പോസ്റ്റാണ് ഇപ്പോൾ സമൂഹ മാദ്ധ്യമങ്ങളിൽ തരംഗമായി മാറുന്നത്. ഭർത്താവിന്റെ മരണ ശേഷം തനിച്ചായതോടെയാണ് താൻ വീണ്ടും വിവാഹിതയാകാൻ തീരുമാനിച്ചതെന്നും തനിക്ക് 1. 2 മില്യന്റെ സ്വത്തുണ്ടെന്നും പറയുന്ന യുവതി പോസ്റ്റിൽ ഭാവിവരനു വേണ്ട ഗുണങ്ങളെക്കുറിച്ചും വ്യക്തമാക്കുന്നുണ്ട്. നല്ല മനസും ആത്മാർത്ഥതയുമുള്ളയാളെയാണ് താൻ തേടുന്നതെന്ന് യുവതി പറയുന്നു. ആന്റി വാങ്ക് എന്ന പേരിലാണ് ഇവർ പോസ്റ്റിട്ടത്. ബാങ്ക് ബാലൻസിന്റെ രസീതും പോസ്റ്റിനൊപ്പം 40കാരിയായ വാങ്ക് പങ്കുവച്ചിട്ടുണ്ട്.

അതേസമയം ഇവരുടെ പോസ്റ്റ് വ്യാജമാണെന്ന പ്രചാരണവും ശക്തമാണ്. വ്യാജ അക്കൗണ്ടാണിതെന്ന് ആരോപിച്ച് നിരവധി പേർ രംഗത്തുവന്നിട്ടുണ്ട്. ആ ബാങ്ക് രസീത് മറ്റാരുടേതെങ്കിലുമാകാമെന്നും അവരത് ദുരുപയോഗം ചെയ്തതാവാനാണ് സാദ്ധ്യതയെന്നും വിലയിരുത്തുന്നവരും കുറവല്ല. കൂടുതൽ വിവരങ്ങൾ പറയൂ എന്നാവശ്യപ്പെട്ടുള്ള കമന്റുകൾക്ക് ഇവർ മറുപടി നൽകിയിട്ടില്ല. എന്തായാലും സിംഗപ്പൂരിലെ ആന്റി വാങ്കിനെ വിവാഹം കഴിക്കാൻ താത്പര്യപ്പെട്ട് രംഗത്തെത്തുന്നവരും ധാരാളമുണ്ടെന്ന് കമന്റ് ബോക്സുകൾ സൂചിപ്പിക്കുന്നു.