ന്യൂയോർക്ക്: ലോകത്ത് കൊവിഡ് ബാധിതരുടെ എണ്ണം മൂന്ന് കോടി എഴുപത്തിനാല് ലക്ഷം പിന്നിട്ടു. ഇതുവരെ 3,7450,148 പേർക്കാണ് വൈറസ് ബാധ സ്ഥിരീകരിച്ചത്. 10,77,218 പേർ മരണമടഞ്ഞു. രോഗമുക്തി നേടിയവരുടെ എണ്ണം 2,8099,954 ആയി.

അമേരിക്കയിൽ ഇപ്പോഴും സ്ഥിതി ഗുരുതരമായി തുടരുകയാണ്. എഴുപത്തി ഒമ്പത് ലക്ഷത്തിലധികം പേർക്കാണ് യു.എസിൽ ഇതുവരെ രോഗം സ്ഥിരീകരിച്ചത്. മരണസംഖ്യ രണ്ട് ലക്ഷത്തി പത്തൊമ്പതിനായിരം പിന്നിട്ടു. രോഗമുക്തി നേടിയവരുടെ എണ്ണം അമ്പത് ലക്ഷം കടന്നു.

ഇന്ത്യയിൽ കൊവിഡ് ബാധിതരുടെ എണ്ണം എഴുപത് ലക്ഷം പിന്നിട്ടു. മരണസംഖ്യ 1.08 ലക്ഷം കടന്നു. കഴിഞ്ഞ ദിവസം 82,753 പേർ രോഗമുക്തരായി, 926 പേർ മരിച്ചു. രാജ്യത്തെ രോഗമുക്തി നിരക്ക് 85.81 ശതമാനമായി ഉയർന്നു. തുടർച്ചയായി രണ്ടാം ദിവസവും ചികിത്സയിലുള്ളവർ 9 ലക്ഷത്തിനു താഴെയാണ്. ചികിത്സയിലുള്ളത് ആകെ രോഗം സ്ഥിരീകരിച്ചവരുടെ 12.65 ശതമാനം മാത്രമാണ്.രോഗികളുടെ എണ്ണത്തിൽ ലോകത്ത് ബ്രസീലാണ് മൂന്നാം സ്ഥാനത്ത്. രാജ്യത്ത് ഇതുവരെ 50,91,840 പേർക്കാണ് കൊവിഡ് സ്ഥിരീകരിച്ചത്. മരണം ഒന്നര ലക്ഷം കടന്നു. 44,53,722 പേർ രോഗമുക്തി നേടി.

അതേസമയം, റഷ്യ രണ്ടാമത്തെ കൊവിഡ് വാക്‌സിന് അംഗീകാരം നൽകാനൊരുങ്ങുകയാണെന്നാണ് ഇപ്പോൾ പുറത്തുവരുന്ന റിപ്പോർട്ടുകൾ.സൈബീരിയയിലെ വെക്ടർ ഇൻസ്റ്റിറ്റ്യൂട്ട് വികസിപ്പിച്ചെടുത്ത വാക്സിനാണ് അംഗീകാരം നൽകാൻ പോകുന്നത്. രാജ്യത്തെ ആദ്യ കൊവിഡ് വാക്സിനായ സ്പുട്നിക് 5 നേരത്തെ രോഗികളിൽ കുത്തിവച്ചിരുന്നു.പരീക്ഷണഘട്ടങ്ങൾ പൂർണമായി കഴിയാതെ രോഗികളിൽ സ്പുട്നിക് വാക്സിൻ കുത്തിവച്ചത് വിവാദമായിരുന്നു.റഷ്യയിൽ ഇതുവരെ 12 ലക്ഷത്തിലധികം പേർക്കാണ് കൊവിഡ് സ്ഥിരീകരിച്ചത്. 22,454 പേർ മരിച്ചു.