‌മോസ്കോ: മൂന്നുമാസം പ്രായമുള്ളപ്പോൾ റഷ്യൻ ദമ്പതികൾ ദത്തെടുത്തതാണ് സ്റ്റെപാനെ. ഒറ്റപ്പെടൽ കാരണം മൂകനായിപ്പോയ അവന് പാലും പഴവും തേനും നൽകി സ്വെറ്റ്ലാന - യൂറി പാൻറ്റിലീൻകോ ദമ്പതികൾ വളർത്തി. ഇന്ന് 28 വർഷങ്ങൾക്കിപ്പുറം, 350 കിലോ ഭാരമുള്ള ബ്രൗൺ കരടി സ്റ്റെപാൻ ലോകത്തെ അറിയപ്പെടുന്ന മോഡലാണ്.

ഒപ്പം ചെടിക്ക് വെള്ളമൊഴിച്ചും ടി.വി കണ്ടും അടുക്കളപ്പണി ചെയ്തും വളർത്തച്ഛനേയും അമ്മയേയും സഹായിക്കുന്നുമുണ്ട്.

കുട്ടികൾക്കും മുതിർന്നവർക്കുമൊപ്പം വിവിധ പോസുകളിൽ ഫോട്ടോഗ്രാഫർക്ക് മുന്നിൽ അനുസരണയോടെ നില്ക്കുന്ന സ്റ്റെപാൻ ആരെയും ഉപദ്രവിക്കില്ല. അടക്കവും ഒതുക്കവുമുള്ള വളർത്തുമൃഗത്തെപ്പോലെ അരുമയാണിവൻ.

ഇവരുടെ സൃഹൃത്തായ മോസ്കോ സ്വദേശിനിയായ മില സ്ഡനോവ എന്ന 40കാരിയായ ഫോട്ടോഗ്രാഫറാണ് സ്റ്റെപാന്റെ തലവര മാറ്റി എഴുതിയത്. മനുഷ്യരോട് നന്നായി ഇണങ്ങുന്ന സ്റ്റെപാനെ മോഡലാക്കാൻ മില തീരുമാനിച്ചു. ഫാന്റസി തീമിൽ റഷ്യൻ പരമ്പരാഗത വസ്ത്രമണിഞ്ഞ മോഡലുകൾക്കൊപ്പം സ്റ്റെപാനെ പോസ് ചെയ്യിപ്പിച്ചു തുടങ്ങി.

മില അത് തന്റെ ക്യാമറ കണ്ണുകളിലൂടെ ഒപ്പിയെടുത്തു. ഈ ഫോട്ടോകൾ കണ്ടാൽ ആരായാലും നോക്കി നിന്നു പോകും. ഡിസ്നിയുടെ ബ്യൂട്ടി ആൻഡ് ദി ബീസ്റ്റ് കഥയാക്കെ പലർക്കും ഓർമ വരാം. ശരിക്കും മദ്ധ്യകാലഘട്ട നാടോടിക്കഥകൾ പുനഃസൃഷ്ടിച്ച പോലെ. ദിവസം അര മണിക്കൂർ വരെയാണ് സ്റ്റെപാൻ ജോലി ചെയ്യുന്നത്.

മോസ്കോയിലെ മഞ്ഞുമലകളാൽ നിറഞ്ഞ വനമേഖലകളും പരിസര പ്രദേശങ്ങളുമാണ് ഫോട്ടോകളുടെ പശ്ചാത്തലം. സ്റ്റെപാന്റെ മോഡലിംഗ് ഹിറ്റായതോടെ ബ്രിട്ടൺ, തായ്‌ലൻഡ്, ഓസ്ട്രിയ, ജർമനി, ഇസ്രയേൽ തുടങ്ങിയ രാജ്യങ്ങളിൽ നിന്നുവരെ മോഡലുകൾ മനോഹരമായ ഫാന്റസി ഫോട്ടോഷൂട്ടിനായി സ്റ്റെപാനെ തേടിവരികയാണ്.

ദിവസേന 25 കിലോ മീൻ, പച്ചക്കറികൾ, മുട്ട എന്നിവയാണ് സ്റ്റെപാന്റെ ഭക്ഷണം. സിനിമഷൂട്ടിംഗ് ഉള്ള ദിവസം ഭക്ഷണത്തിന്റെ അളവ് അല്പം കൂടുതലാകുമെന്ന് മാത്രം.