ഐസ്ക്രീം ഇഷ്ടമില്ലാത്ത ആരാണുള്ളത്. ഒരു കോൺ ഐസ് ക്രീമിൽ ഒരു സ്കൂപ്പിന് മുകളിൽ മറ്റൊരു സ്കൂപ് ഐസ്ക്രീം കൂടെ കിട്ടിയാൽ വളരെയേറെ സന്തോഷിക്കുന്നവരാണ് നമ്മൾ. ഒരു കോണിൽ പരമാവധി എത്ര സ്കൂപ് ഐസ്ക്രീം കിട്ടും രണ്ടോ,​ മൂന്നോ. എന്നാൽ ഇറ്റലിക്കാരൻ ദിമിത്രി പാൻസിയേര ഒരു കോണിൽ 125 സ്കൂപ് ഐസ് ക്രീം വെച്ച് റെക്കാഡ് നേടിയിട്ടുണ്ട്. ഗിന്നസ് ബുക്ക് ഒഫ് റെക്കോർഡിന്റെ കണക്കനുസരിച്ച് 2013-ൽ ഒരു കോണിൽ 85 സ്കൂപ്പ് ഐസ്ക്രീമുകൾ വച്ച് പാൻസിയേര തന്നെയായിരുന്നു ഈ റെക്കാഡ് ആദ്യം സ്ഥാപിച്ചത്. എന്നാൽ, പിന്നീട് 123 സ്കൂപ്പ് ഐസ് ക്രീം നിലത്ത് വീഴാതെ ക്രമീകരിച്ച് അഷ്‌രിത ഫർമാൻ ഈ റെക്കാഡ് തകർത്തു. ഈ റെക്കാഡ് ആണ് ഇപ്പോൾ 125 സ്കൂപ് ഐസ്ക്രീം അടുക്കിവച്ച് പാൻസിയേര സ്വന്തമാക്കിയത്. ഇറ്റലിയിലെ ഗിന്നസ് ടിവി സ്‌പെഷലായ ലാ നോട്ട് ഡേ റെക്കോർഡിൽ ആണ് പാൻസിറ തന്റെ റെക്കോർഡ് തിരിച്ചുപിടിച്ചത്

ഇതിന്റെ വീഡിയോ സമൂഹമാദ്ധ്യമങ്ങളിൽ ഇതിനോടകം തന്നെ വൈറലായിട്ടുണ്ട്. ദിമിത്രിയുടെ കോണിൽ ഒന്നിനു പുറകെ ഒന്നായി ഐസ്ക്രീം സ്കൂപ്പുകൾ ഉയരുന്നത്, വളരെ വിസ്മയത്തോടെയാണ് പ്രേക്ഷകർ നോക്കിക്കാണുന്നത്. 125 സ്കൂപ്പുകൾ ക്രമീകരിച്ചതിന് ശേഷം 10 സെക്കന്റ് നേരം ഒന്നും നിലത്ത് വീഴുന്നില്ല എന്നുറപ്പ് വരുത്തിയതിന് ശേഷമാണ് വിധികർത്താക്കൾ മൊത്തം സ്കൂപ്പുകളുടെ എണ്ണം കണക്കാക്കി പുതിയ ഗിന്നസ് റെക്കാഡ് പ്രഖ്യാപിച്ചത്.