ദുബായ്: ഈ വർഷത്തെ ദുബായ് ഷോപ്പിംഗ് ഫെസ്റ്റിവൽ ഡിസംബർ 17 മുതൽ 2021 ജനുവരി 30 വരെ നടക്കും. സംഘാടകരായ ദുബായ് ഫെസ്റ്റിവെൽസ് ആൻഡ് റീട്ടെയിൽ എസ്റ്റാബ്ലിഷ്‍മെന്റ് ആണ് ഇത് സംബന്ധിച്ച ഔദ്യോഗിക പ്രഖ്യാപനം നടത്തിയത്.കൊവിഡ് കാലമായതിനാൽ നിയന്ത്രണങ്ങളോടെയാണ് ഫെസ്റ്റിവെലിനെ വരവേൽക്കാൻ ഒരുങ്ങുന്നത്. എന്നാൽ,​ എന്തൊക്കെയാണ് നിയന്ത്രണങ്ങൾ എന്ന് ഇതുവരെ പ്രഖ്യാപിച്ചിട്ടില്ല.

ഷോപ്പിംഗിന് പുറമേ വിവിധ പരിപാടികളും ഒരുക്കിയിട്ടുണ്ട്. തത്സമയ സംഗീത പരിപാടികൾ, സ്റ്റേജ് ഷോ, കുടുംബങ്ങൾക്കായി മറ്റു വിനോദ പരിപാടികൾ എന്നിവ ഒരുക്കിയിട്ടുണ്ട്. കഴിഞ്ഞ വർഷം 2019 ഡിസംബർ 26 മുതൽ 2020 ഫെബ്രുവരി 1 വരെയായിരുന്നു ഫെസ്റ്റിവൽ നടന്നത്. ഇത്തവണ ഒരാഴ്‍ച്ച നേരത്തെയാണ് എത്തുന്നത്. ലോകപ്രശസ്ത ഗായകരുടെ സംഗീത നിശയോടെയായിരിക്കും പരിപാടി തുടങ്ങുക. സ്‍കൂൾ അവധി ദിവസങ്ങൾ അടക്കം പരിഗണിച്ചാണ് തീയതി പ്രഖ്യാപിച്ചിരിക്കുന്നത്. ഇതോടെ പരമാവധിപേർക്ക് ഫെസ്റ്റിവലിൽ പങ്കെടുക്കാൻ സാധിക്കുമെന്നാണ് അധികൃതരുടെ കണക്കുകൂട്ടൽ.