വാഷിംഗ്ടൺ: ബ്രിട്ടീഷ് കുടുംബാംഗമായ ഹാരി രാജകുമാരനെ വിവാഹം ചെയ്തത് മുതൽ മാദ്ധ്യമങ്ങളുടെ നോട്ടപ്പുള്ളിയാണ് മേഗൻ മാർക്കിൾ. രാജപദവികൾ ഉപേക്ഷിച്ച് മേ​ഗനും ഹാരിയും കൊട്ടാരം വിട്ടതിനു പിന്നിലും മേ​ഗനാണെന്ന് ആരോപണങ്ങൾ ഉയർന്നിരുന്നു. ഇപ്പോഴിതാ സമൂഹമാദ്ധ്യമങ്ങളിൽ നിന്ന് വിട്ടുനിൽക്കാനുണ്ടായ തീരുമാനത്തെക്കുറിച്ച് തുറന്നു പറഞ്ഞിരിക്കുകയാണ് മേ​ഗൻ. ഫോർച്യൂൺ മാ​ഗസിന് നൽകിയ അഭിമുഖത്തിലാണിത്. സ്വയരക്ഷയ്ക്ക് വേണ്ടിയാണ് സമൂഹമാദ്ധ്യമങ്ങളിൽ നിന്ന് അകലം പാലിച്ചതെന്നാണ് മേ​ഗൻ പറയുന്നത്.

' ഒരു സമൂഹമാദ്ധ്യമത്തിലും അക്കൗണ്ട് വേണ്ടെന്നത് വ്യക്തിപരമായി എടുത്ത തീരുമാനമാണ്. അതുകൊണ്ടുതന്നെ അവിടെ എന്താണ് സംഭവിക്കുന്നതെന്ന് തനിക്കറിയില്ല. പലരീതിയിലും അതു തന്നെ സഹായിക്കുകയും ചെയ്തിട്ടുണ്ട്. പേഴ്സണൽ അക്കൗണ്ടുകൾ ഉപയോഗിക്കുന്നത് വർഷങ്ങൾക്ക് മുമ്പേ നിറുത്തി. നിലവിലുള്ളത് ഹാരിയുടെയും തന്റെയും പേരിലുള്ള ഔദ്യോ​ഗിക അക്കൗണ്ടാണ്. അതു കൈകാര്യം ചെയ്യുന്നത് മറ്റുള്ളവരാണ്. ഇന്ന് തന്റെ സമയമേറെയും ചെലവഴിക്കുന്നത് മകൻ ആർച്ചിക്കു വേണ്ടിയാണെന്നും' മേ​ഗൻ പറയുന്നു.

അടുത്തിടെ വിമർശനങ്ങളും വിവാദങ്ങളും തന്നെ എത്രത്തോളം തകർക്കുന്നുവെന്ന് മേ​ഗൻ വ്യക്തമാക്കിയിരുന്നു. വിമർശനങ്ങൾ തന്റെ മാനസികാരോ​ഗ്യത്തെ ബാധിച്ചതെങ്ങനെയെന്നാണ് മാനസികാരോ​ഗ്യം സംബന്ധിച്ച ടീനേജർ തെറാപ്പി എന്ന പോഡ്കാസ്റ്റിൽ സംസാരിക്കവേ മേ​ഗൻ തുറന്നു പറഞ്ഞത്.