വാഷിംഗ്ടൺ: അധികാരത്തിലെത്തിയാൽ 1.1കോടി ആളുകൾക്ക് പൗരത്വം നൽകുമെന്ന് അമേരിക്കയിലെ ഡെമോക്രാറ്റിക് പ്രസിഡന്റ് സ്ഥാനാർത്ഥി ജോ ബൈഡൻ. കൊവിഡ് നിർമ്മാർജ്ജനത്തോടൊപ്പം താൻ പ്രാധാന്യം നൽകുന്ന വിഷയമാണിതെന്നും ബൈഡൻ പറയുന്നു. രാജ്യത്തെ സാമ്പത്തിക വ്യവസ്ഥ പുനരുജ്ജീവിപ്പിക്കുന്നതിനും വിവിധ ലോകരാജ്യങ്ങളുമായുള്ള ബന്ധം വീണ്ടെടുക്കുന്നതിനും പ്രഥമ പരിഗണന നൽകുമെന്നാണ് ബൈഡന്റെ പ്രഖ്യാപനം. കുടിയേറ്റവുമായി ബന്ധപ്പെട്ട പ്രശ്നങ്ങൾ പരിഹരിക്കാൻ ബിൽ കൊണ്ടുവരുമെന്നും ഈ ബിൽ അനുസരിച്ച് 11 മില്യൺ ആളുകൾക്ക് പൗരത്വം ലഭിക്കുമെന്നുമാണ് ബൈഡൻ കഴിഞ്ഞ ദിവസം പ്രഖ്യാപിച്ചതെന്നാണ് അന്തർദ്ദേശീയ മാദ്ധ്യമങ്ങൾ റിപ്പോർട്ട് ചെയ്യുന്നത്. ട്രംപ് ചെയ്തുവച്ച തകരാറുകൾ നീക്കാൻ കഠിനപ്രയത്നം ചെയ്യേണ്ടി വരുമെന്നും ബൈഡൻ പറഞ്ഞു. മഹാമാരിയെ ശക്തമായ പ്രതിരോധിച്ച ശേഷമാകും വിഭാവനം ചെയ്തിട്ടുള്ള പദ്ധതികൾ ആവിഷ്കരിക്കുകയെന്നും ബൈഡൻ കൂട്ടിച്ചേർത്തു.