മുംബയ് : ഇന്ത്യയിലെ ആദ്യത്തെ ഓസ്കാർ പുരസ്കാര ജേതാവും കോസ്‌റ്റ്യൂം ഡിസൈനറുമായ ഭാനു അതയ്യ അന്തരിച്ചു. 91 വയസായിരുന്നു. ദീർഘനാളായി രോഗബാധിതയായിരുന്ന ഭാനുവിന് ഇന്ന് പുലർച്ചെ സ്വവസതിയിൽ വച്ച് ഉറക്കത്തിലാണ് അന്ത്യം സംഭവിച്ചത്. 1983ൽ വിഖ്യാത ചിത്രം ' ഗാന്ധി 'യിലെ വസ്ത്രാലങ്കാരത്തിനാണ് ഭാനുവിനെ തേടി ഓസ്കാർ എത്തിയത്. ദക്ഷിണ മുംബയിലെ ചന്ദൻവാഡി ശ്മശാനത്തിൽ അന്ത്യകർമങ്ങൾ നടന്നു.

എട്ട് വർഷം മുമ്പ് ഭാനുവിന് ബ്രെയിൻ ട്യൂമർ ബാധിച്ചിരുന്നു. കഴിഞ്ഞ മൂന്ന് വർഷമായി ശരീരത്തിന്റെ ഒരു ഭാഗം തളർന്ന് കിടപ്പിലായിരുന്നു ഭാനു എന്ന് മകൾ രാധിക ഗുപ്ത പറഞ്ഞു. മഹാരാഷ്ട്രയിലെ കോലാപ്പൂരിൽ ജനിച്ച ഭാനു 1956ൽ ഗുരുദത്തിന്റെ സൂപ്പർ ഹിറ്റ് ചിത്രമായ സി.ഐ.ഡി എന്ന ചിത്രത്തിലൂടെയാണ് ഭാനു കോസ്റ്റ്യൂം ഡിസൈനറായി കരിയർ ആരംഭിച്ചത്. റിച്ചാർഡ് ആറ്റെൻബറോ സംവിധാനം ചെയ്ത ഗാന്ധിയിൽ ജോൺ മോളോയ്ക്കൊപ്പമാണ് മികച്ച കോസ്റ്റ്യൂം ഡിസൈനുള്ള പുരസ്കാരം ഭാനു സ്വന്തമാക്കിയത്.

2012ൽ, തന്റെ ഓസ്കാർ പുരസ്കാരം സുരക്ഷിതമായി സൂക്ഷിക്കാനായി ഭാനു ദ അക്കാഡമി ഒഫ് മോഷൻ പിക്ചേഴ്സ് ആർട്സ് ആൻഡ് സയൻസസിന് കൈമാറിയിരുന്നു. അഞ്ച് ദശാബ്ദം നീണ്ട കരിയറിൽ 100 ലേറെ ചിത്രങ്ങളുടെ ഭാഗമായ ഭാനു ലെകിൻ ( 1990 ), ലഗാൻ ( 2001) എന്നീ ചിത്രങ്ങളിലൂടെ രണ്ട് ദേശീയ പുരസ്കാരങ്ങളും സ്വന്തമാക്കിയിരുന്നു.